Владата на Гренланд денес објави дека е постигнат напредок во разговорите со САД за иднината на арктичкиот остров, но рече дека Гренланд никогаш нема да биде на продажба, и покрај интересот на американскиот претседател Доналд Трамп за американска контрола врз територијата.

Специјалниот претставник на САД, Џеф Ландри, кого Трамп го назначи минатата година да ја предводи иницијативата за зајакнување на влијанието на САД во Гренланд, пристигна во Нуук во неделата, каде што денес се сретна со премиерот Јенс Фредерик Нилсен и министерот за надворешни работи Муте Егеде.

„Веруваме дека има напредок и од гренландска страна сме фокусирани на наоѓање решение што ќе биде добро за сите нас, а најважно е да нема закана од анексија, преземање или купување на Гренланд и народот на Гренланд“, изјави Нилсен за новинарите по состанокот, објави Ројтерс.

Ландри сè уште не дал официјална изјава, но по пристигнувањето им рекол на локалните медиуми дека дошол да „слуша и да учи“.

Изјавите на Доналд Трамп дека САД мора да го преземат или контролираат Гренланд, автономна територија на Данска, предизвикаа тензии меѓу Вашингтон и Копенхаген, кои се членки на НАТО, но и пошироко во Европа.

„Тие побараа состанок, а ние ја објаснивме нашата ситуација и позиции, како и нашите црвени линии - нема да го продадеме Гренланд, Гренланд ќе остане наш засекогаш“, рече Егеде.

Гренланд, Данска и САД претходно оваа година се согласија да одржат дипломатски разговори на високо ниво за да се обидат да ја решат кризата, но резултатите од тие разговори сè уште не се објавени јавно.

Соединетите Американски Држави сакаат да го зголемат своето воено присуство во Гренланд и да го вклучат островот во планираниот нуклеарен одбранбен систем „Златна купола“ на Трамп.

САД моментално имаат една активна база во Гренланд, вселенската база Питуфик на северозапад од островот, додека во 1945 година имаа околу 17 воени инсталации низ Гренланд со илјадници американски војници и персонал.