Маск: СпејсX го промени својот приоритет, целта сега е да се насели Месечината, а не Марс

Сопственикот на Тесла и компанијата СпејсX, Илон Маск, изјави дека приоритетот на компанијата се променил и дека сега целта е да се насели Месечината, а не Марс.

Тој во објава на социјалната мрежа X рече дека тоа би можело да се случи за помалку од 10 години.

„Најважниот приоритет е обезбедувањето на иднината на цивилизацијата, во таа смисла Месечината е побрза. Патувањето до Марс е можно само кога планетите се порамнуваат на секои 26 месеци (време на патување од шест месеци), додека ние можеме да летаме до Месечината на секои 10 дена (време на патување од два дена)“, напиша Маск.

Тој, исто така, истакна дека компанијата останува посветена на изградба на град на Марс и дека тоа ќе започне за околу пет до седум години, и дека ова е водечка цел на компанијата СпејсХ уште од нејзиното основање во 2002 година.

Инаку, СпејсX пред неколку дена објави дека го купи xAИ, спојувајќи ги двете компании на милијардерот Илон Маск во она што се вели дека е највредната приватна компанија во светот.

Минатата недела, СпејсX поднесе барање за дозвола од Федералната комисија за комуникации за лансирање констелација од еден милион сателити, со цел создавање мрежа од центри за податоци напојувани од сончева енергија за цели на вештачка интелигенција.

Лансирани од масивната ракета Старшип, овие сателити ќе формираат констелации во вселената и ќе служат како лебдечки суперкомпјутери.