Министерот за надворешни работи и надворешна трговија, Тимчо Муцунски, во рамки на дводневната посета на Државата Катар, денеска оствари средба со претседателот на Владата и министер за надворешни работи, шеикот Мохамед бин Абдулрахман бин Џасим Ал Тани.

Од Министерството информираат дека во разговорите со претседателот на Владата на Катар било потврдено одличното ниво на билатералните односи и била реафирмирана заедничката определба за нивно понатамошно унапредување.

Посебен акцент бил ставен на продлабочувањето на политичкиот дијалог, како и на економската и инвестициската соработка, како значајни сегменти од идните односи меѓу двете држави.

Соговорниците размениле мислења и за актуелните регионални и меѓународни прашања, со фокус на состојбите на Блискиот Исток, пошироката меѓународна безбедносна средина и можностите за поинтензивна соработка во рамки на мултилатералните организации.

„Ги разгледавме можностите за унапредување на соработката во областа на одбраната и безбедноста, надградувајќи го силното партнерство меѓу нашите две земји. Го истакнавме придонесот на нашата земја како сојузник во НАТО и го поздравивме вредното партнерство на Катар со Алијансата во промовирањето на мирот и стабилноста“, напиша Муцунски на социјалните платформи.

За време на средбата било нагласено дека посетата ќе даде нов импулс на севкупната билатерална соработка и ќе отвори дополнителни можности за реализација на заеднички иницијативи.

„Разговаравме за можностите за натамошно продлабочување на билатералната економска и трговска соработка, како и за создавање нови можности за поврзување на бизнис-заедниците на двете држави. Се согласивме дека позитивната динамика во политичките односи треба да биде проследена со поинтензивна инвестициска и трговска соработка, преку конкретни иницијативи. Воедно, разменивме мислења за конкретни области со потенцијал за продлабочување на економските односи, зголемување на трговската размена и поттикнување поактивна соработка“, изјави Муцунски.

Во рамки на посетата, министерот Муцунски оствари и средба со државниот министер за надворешни работи, Султан бин Саад Ал-Мураичи.

По средбата биле потпишани Договорот меѓу владите на двете земји за ослободување од визи за носителите на дипломатски, службени и специјални пасоши, Меморандумот за воспоставување политички консултации и Меморандумот за соработка во областа на дипломатската едукација.

Со потпишувањето на овие документи е поставена дополнителна институционална основа за натамошно унапредување на политичките односи и за зајакнување на соработката во областите од заемен интерес.