Соочена со сериозна пренатрупаност на затворите, Белгија разгледува необично решение, изградба или изнајмување затвор во странство, објавија локалните медиуми во среда.
Министерката за правда, Анелис Верлинден и министерката за миграција, Анелин Ван Босујт беа во повеќедневна посета на Албанија и Косово за да разговараат за можноста за изградба или изнајмување затворски објект надвор од Белгија, објави „The Brussels Times“.
Белгиските затвори се пренатрупани, со повеќе од 13.000 затвореници и само 11.000 места, земјата доживува рекордна пренатрупаност. Во некои установи, притворениците спијат на душеци поставени директно на подот.
Планот се базира на данскиот договор со Косово од 2021 година и претходен белгиско-холандски експеримент во затворот Тилбург. Според предлогот, странските државјани осудени во Белгија, но без дозвола за престој, ќе ги издржуваат своите казни во затвор изграден или изнајмен на Балканот.
„Овозможувањето на лице осудено во Белгија, но без дозвола за престој, да ја издржува казната во неговата земја на потекло значи правилно спроведување на правдата и олеснување на товарот врз нашиот систем“, изјави Верлинден пред нејзиното заминување.
Белгија моментално има околу 4.400 недокументирани затвореници - речиси една третина од вкупната затворска популација. Според „Брусел тајмс“, владата се надева дека со префрлање на некои од нив во странство, може да го намали притисокот врз преполните затвори.
Дводневната посета започна во Приштина, каде што министрите разговараа со косовската претседателка Вјоса Османи и министерот за правда Блерим Салаху, а потоа во Тирана со министерот за правда Бесфорт Ламалари и министерката за внатрешни работи Албана Кочиу.
Целите на посетата се да се процени политичката подготвеност за прифаќање на белгиските затвореници и да се зајакне соработката во борбата против организираниот криминал, особено трговијата со дрога, шверцот со луѓе и перењето пари.
Се очекува да се потпише и декларација за споделување на конфискуваниот имот на криминалните мрежи. Белгија сака да врати дел од стотиците милиони евра што балканските криминални групи ги инвестирале во недвижности, откриени за време на истрагите за шифрираната мрежа Скај.
„Само во Албанија има осум тековни судски случаи со околу 160 милиони евра запленети средства“, рече Верлинден, додавајќи:
„Меѓународната соработка е клучна - со конфискација на средства, ги удираме таму каде што најмногу боли.“
