Германскиот министер за надворешни работи Јохан Вадефул во денеска изјави дека Русија не е подготвена за прекин на огнот и дека санкциите треба да се засилат за да се зголеми притисокот врз Москва да ги запре нападите и да се врати на преговарачката маса.

Говорејќи на панел-дискусија во рамките на Варшавскиот безбедносен форум во полскиот главен град, Вадефул го критикуваше договорот на администрацијата на Трамп со Русија во врска со дизелот. Тој нагласи дека Европејците треба да останат доследни и да не отстапуваат од санкциите против Москва.

Прашан за неговата средба со рускиот министер за надворешни работи Сергеј Лавров во Њујорк минатиот месец, по долга пауза во дијалогот на високо ниво, Вадефул рече дека разговорите му покажале оти руската страна не е заинтересирана за прекин на огнот.

„Многу луѓе во Европа, а особено во Германија, нè прашуваа нас и мене: ’Зошто не разговарате со Русите?‘“, рече тој. „И така, сега го имав тој разговор и го видовте резултатот. Тоа е многу мрачен резултат“, додаде тој, осврнувајќи се на силните руски напади врз цивилната енергетска инфраструктура на Украина.

Високиот германски претставник оцени дека рускиот претседател Владимир Путин во моментов се обидува да ја одолговлекува војната, сметајќи дека може да ја доведе Украина во потешка положба во текот на зимата.

„Тој смета дека одолговлекувањето на војната и искористувањето на воените можности што ги има во текот на зимата е полесниот пат за него“, рече Вадефул, додавајќи дека, како контрастратегија, западните земји треба дополнително да ги засилат санкциите за да го зголемат притисокот врз Москва.

„Мораме да ја земеме предвид неговата проценка, елементите на неговото размислување и да му го промениме сценариото“, рече тој. „А тоа е можно само ако тој сфати дека одолговлекувањето на војната е поризичен пат за него лично или за неговиот режим.“

Тој исто така истакна дека европските земји очекуваат Кина да го искористи своето влијание врз Русија за да помогне во ставањето крај на конфликтот и изнаоѓањето дипломатско решение.

„Очекуваме Кина, која има најголемо влијание врз рускиот режим, навистина јасно да им стави до знаење дека мораат да ја запрат оваа војна. И, се разбира, сметам дека овој многу јасен и цврст став на Европската Унија и на другите европски партнери е многу важен“, рече Вадефул.