Израелскиот министер за одбрана Израел Кац се закани дека ќе го „елиминира“ секој што ќе се приближи до гребенот Али ал-Тахер во јужен Либан, наведувајќи дека Армијата се подготвува да ја преземе контролата врз таа област.

Кац тврдеше дека израелските сили убиле борци на Хезболах и ги уништиле нивните тунели таму, како и дека се подготвуваат да спречат тие или која било друга страна повторно да воспостави присуство.

Тој изјави дека гребенот е дел од она што Израел го нарекува „жолта линија“ и самопрогласена „безбедносна зона“ во внатрешноста на Либан, која опфаќа околу 700 квадратни километри.

Исто така, тој нагласи дека Израел нема да се повлече ниту да ги прераспореди силите сè додека Хезболах не биде разоружан низ цел Либан.

Нема моментална реакција од либанските власти или од Хезболах.

Во четвртокот, израелската Армија изврши минирање на делови од гребенот Али ал-Тахер, наведувајќи дека уништила мрежа од тунели на Хезболах и друга инфраструктура што се протегала во должина од повеќе од два километра.

Израелскиот премиер Бенјамин Нетанјаху подоцна ја опиша таа локација како „најголема иранска локација надвор од Иран“.

Гребенот се наоѓа северно од реката Литани, меѓу Кфар Тибнит и Набатије ал-Фавка, и доминира над големи делови од јужен Либан, што му дава стратегиско воено значење.

Претходно овој месец, Нетанјаху тврдеше дека израелските сили го завршиле „расчистувањето“ на областа.

Според официјалните либански податоци, во израелските напади во Либан од 2 март досега загинале речиси 4.400 луѓе, а 12.500 се повредени.

Израел продолжува да окупира области во јужен Либан, вклучително и територии што ги држи со децении, како и други локации заземени за време на неодамнешните воени операции.