Гувернерот на јеменската покраина Хадрамаут, Салем Ал-Канбаши, изјави дека сепаратистичкиот Јужен преоден совет (СТЦ) нема друг избор освен целосно да ги повлече силите од источната јеменска покраина или да се соочи со воена конфронтација.

„Проблемот сè уште постои бидејќи СТЦ не се повлече. Нема друг избор освен целосно и безусловно да се повлече или да се соочи со воена конфронтација“, рече тој,

Канбаши ги обвини силите на СТЦ дека се обидуваат да ја преземат контролата врз нафтените ресурси во покраината.

Овие сили „нема да се повлечат мирно како што се очекуваше“, рече Канбаши.

Тензиите ескалираа во јужен Јемен минатиот месец откако силите на СТЦ ги зазедоа покраините Хадрамаут и Ал-Махра во источен Јемен по судирите со владините сили. Двете покраи сочинуваат речиси половина од површината на Јемен.

Саудиска Арабија ги обвини Обединетите Арапски Емирати (ОАЕ) дека ги поттикнуваат силите на СТЦ да спроведуваат воени операции по должината на јужната граница на кралството. ОАЕ ги отфрлија, како што ги нарекоа, „обвинувањата“ и ја нагласија својата посветеност на безбедноста на Саудиска Арабија.

Потоа, претседателскиот совет на Јемен го откажа заедничкиот одбранбен договор со ОАЕ и им нареди на сите емиратски сили да го напуштат Јемен во рок од 24 часа.

СТЦ постојано тврди дека последователните влади ги маргинализирале политички и економски јужните региони и повикува на нивно одвојување од северот - тврдења отфрлени од јеменските власти, бидејќи тие инсистираат на зачувување на територијалното единство на земјата.