Иран ќе го заплени имотот на иранските државјани во странство што се „виновни за соработка“ со Соединетите Американски Држави (САД) и Израел, во рамките на војната што Вашингтон и Тел Авив ја почнаа против Техеран, соопшти Канцеларијата на јавниот обвинител на земјата.

Во вчерашното соопштение Канцеларијата се повика на законот донесен минатиот октомври, во кој се предвидува дека секоја соработка со Израел, САД „или други непријателски држави или групи подлежи на 'конфискација на целиот имот' и на други законски казни во согласност со Исламскиот кривичен законик“, објави државната телевизија Прес ТВ.

„Секое оперативно дејствување во име на ционистичкиот (израелски) режим или непријателска влада, вклучително и Владата на САД или други непријателски режими или групи, или во име на кој било поврзани елементи, кои се против безбедноста на земјата, наложува конфискација на целиот имот, во согласност со вториот дел од Забелешка (5) од член (19) од Исламскиот кривичен законик усвоен на 21.4.2013 година со последователни измени и дополнувања, како и смртна казна“, ја пренесува Прес ТВ одредбата од законот.

Според иранските власти, убиени се повеќе од 1.200 лица, меѓу кои и врховниот лидер Али Хаменеи, а над 10.000 се повредени откако САД и Израел започнаа заеднички напад врз Иран на 28 февруари 2026 година.

Техеран возврати со напади со ракети и беспилотни летала врз Израел, како и врз земји во Заливот во кои се наоѓаат американски воени бази.

Иранскиот Совет на експерти вчера за нов врховен лидер на земјата го избра синот на Али Хаменеи, Моџтаба Хаменеи.