Медиуми: Виткоф и Кушнер ја откажале посетата на Израел

Американските специјални пратеници Стив Виткоф и Џаред Кушнер ја откажале својата посета на Израел закажана за вторник, објави денес Ерусалим Пост, повикувајќи се на неименувани извори.

Според претходната агенда, било планирано двајцата пратеници да пристигнат во Израел на разговори за војната меѓу Израел и Иран, но, во меѓувреме, наводно се појавиле несогласувања меѓу Вашингтон и Тел Авив поради израелските напади врз нафтената инфраструктура на Иран.

Според израелските медиуми, Израел однапред го информирал Вашингтон за плановите за таргетирање на нафтената инфраструктура, но не посочил дека нападите ќе бидат толку обемни.

„Не мислиме дека тоа беше добра идеја“, рече неименуван американски функционер, додавајќи дека американската војска очекувала во голема мера симболичен удар и била изненадена од обемот на операцијата.

Според него, американските претставници стравуваат дека таргетирањето на инфраструктурата што снабдува гориво и за цивилното население во Техеран би можело да има спротивен ефект, зајакнувајќи го иранскиот режим и свртувајќи го јавното мислење против Израел и САД.

Израелски безбедносен функционер, цитиран од Канал 12, изјави дека нападите врз складиштата за гориво делумно имале за цел да испратат порака до Техеран да ги запре нападите врз цивилни цели во Израел.

Соединетите Американски Држави и Израел го нападнаа Иран наутро во сабота, 28 февруари, во она што го нарекоа „превентивни напади“, кои дојдоа по неуспехот на неколку рунди преговори за нуклеарната програма на Иран.

Потоа Иран започна масовни одмазднички напади врз Израел и цели поврзани со САД низ регионот на Блискиот Исток.