Високата претставничка на Европската Унија (ЕУ) за надворешни работи и безбедносна политика, Каја Калас, денес изјави дека нападот со дрон во близина на воз што превезувал европски функционери во Украина имал цел да ги заплаши западните земји и да ги одврати од поддршката за Киев.
„Сметам дека тоа е јасно наменето да ги исплаши западните земји и да ги одврати од поддршката за Украина, односно од патувањето во Украина за да ја покажат таа поддршка“, им рече Калас на новинарите пред почетокот на Европскиот самит за Арктикот во Рованиеми, Финска.
„Прашањето за нас е: каква порака извлекуваме од тоа? Мислам дека треба да постапиме спротивно. Треба да покажеме дека сме тука за Украина и дека нема да дозволиме да нè исплашат“, рече таа.
Калас истакна дека повлекувањето би ѝ одело во прилог на целта на Русија да ја принуди Украина на „потчинување“.
„И како што неколкупати веќе кажав, тоа не е нивна крајна цел. Нивната крајна цел е многу поголема. Затоа мора цврсто да се спротивставиме на ова“, додаде таа.
Нејзините изјави следуваа откако германскиот весник „Шпигел“ објави дека приватниот воз што вчера патуваше од Киев кон Полска, превезувајќи европски функционери и поранешниот британски премиер Борис Џонсон, бил евакуиран по напад со дрон во негова близина.
Калас, исто така, укажа на растечките безбедносни грижи за Арктикот, посочувајќи на повторното отворање на поранешните советски воени бази од страна на Русија, на ракетните вежби на крајниот север и на зголемениот интерес на Кина за овој регион.
Таа рече дека ЕУ подготвува нова стратегија за Арктикот во чиј фокус е безбедноста, а која се очекува да биде претставена во октомври.
Калас изјави дека ЕУ мора да задржи обединет став за безбедноста на Арктикот и за другите прашања што влијаат врз регионот, додавајќи дека Гренланд веројатно нема да биде предмет на посебна дискусија.
За време на својот мандат американскиот претседател Доналд Трамп во повеќе наврати повикуваше на американска контрола врз Гренланд, нарекувајќи го тоа историска и стратегиска неопходност. Сепак, лидерите и на Данска и на Гренланд цврсто го отфрлија предлогот, нагласувајќи дека Гренланд „не е на продажба“.
