Украина ќе продолжи со нападите врз руските рафинерии, изјави украинскиот претседател Володимир Зеленски во интервју за Фајненшл тајмс објавено во четврток.

„Ограничувањето на нападите врз рафинериите повеќе не важи. Заврши“, изјави Зеленски за британскиот весник.

Тој ја критикуваше подготвеноста на Вашингтон да склучува деловни договори со Москва и очигледното восхитување на американскиот претседател Доналд Трамп од рускиот претседател Владимир Путин, објави Фајненшл тајмс.

Кога беше прашан дали Украина ќе се согласи да ги запре нападите врз енергетската инфраструктура со цел да ги подобри односите со Белата куќа, Зеленски одговори дека може да се согласи на ова само во замена за дополнителни американски пресретнувачки ракети за системите за воздушна одбрана Патриот.

Тој ја нарече таквата испорака минимум што би бил прифатлив за Украина.

Зеленски за Фајненшл тајмс изјави дека украинските сили останале без американски системи за рано предупредување за дојдовни балистички ракети.

Во исто време, сателитската комуникациска услуга Старлинк на Елон Маск беше забавена низ целата земја, што го отежнува спроведувањето операции на фронтот и нападите со среден дострел врз руските воени цели.

„Украинските воени претставници беа предупредени од нивните американски колеги дека ако не ги запрат нападите врз енергетската инфраструктура, ќе бидат лишени од разузнавачки информации“, рече Зеленски.

Тој додаде дека на Киев подоцна му било дадено објаснување дека станува збор за технички проблем. Тој ја отфрли можноста дека тешкотиите со сателитскиот систем Старлинк се резултат на технички дефект.

„Не стануваше збор за технички проблем, туку за прашање на волја“, изјави Зеленски за Фајненшл тајмс.

Наскоро пристигна одговор од Илон Маск, кој веднаш укажа дека Старлинк е систем за цивилна употреба, за која е одговорна неговата компанија СпејсХ, а системот што го користи Украина е Старшилд, која е воена мрежа составена од сателити на Маск, но дека секое забавување на системот е одговорност на американската влада, а не на неговата компанија.

„Системите Старшилд се во сопственост и под контрола на американската влада. Сите ограничувања на брзината или користењето ги одлучува американската војска, а на крајот и претседателот на САД“, напиша Илон Маск на Х.

Зеленски претходно во среда во емисијата Пирс Морген Нецензурирано изјави дека било „болно“ кога Доналд Трамп застанал на страна во војната на Украина против Русија, откако американскиот претседател рече дека Зеленски треба да биде заменет.

„Болно е кога претседателот Трамп избира една страна, која не е наша страна. Не ми пречи ако Трамп е во средината помеѓу Украина и Русија, но ако сте во средината, мора да останете во средината“, рече Зеленски

Прашан дали се чувствува предаден од Трамп, со оглед на тоа што американскиот претседател во текот на викендот, откако се согласи да ги укине санкциите за извоз на руски дизел, побара Украина да добие нов претседател, Зеленски одговори: „Искрено, да... но сепак е малку покомплицирано од само моите емоции или моите чувства. Штета е што губиме силен партнер“, додаде тој.

Зеленски, исто така, рече: „Ние не ја продаваме нашата земја... за нас тоа не е прашање на бизнис, тоа е едноставно наш живот и ова е нашата земја“.