Јужнокорејскиот претседател Ли Џе-мјунг и турскиот претседател Реџеп Таип Ердоган се согласија да го продлабочат стратегиското партнерство меѓу нивните земји и да ја прошират соработката во неколку области, особено во нуклеарната енергија, одбранбената индустрија, трговијата и технологијата.

Ли говореше на заедничката прес-конференција со Ердоган, по билатералната средба и состанокот на делегациите во Претседателската палата во јужнокорејскиот главен град Сеул.

Изразувајќи задоволство што ги пречекал Ердоган и неговата делегација, Ли рече: „Туркије е наш крвен брат во срцата на нашите народи, односно брат поврзан со нас со крвни врски.“

Тој нагласи дека јужнокорејскиот народ им ги должи слободата и мирот во кои денес ужива на околу 20.000 турски војници што се бореле заедно со корејскиот народ за време на Корејската војна од 1950 до 1953 година, оддавајќи им почит на нивните жртви.

„Денес претседателот Ердоган и јас се согласивме да ја прошириме нашата соработка врз основа на длабокото пријателство и доверба што ги изградивме преку крвните врски“, рече Ли.

Тој соопшти дека двајцата лидери го разгледале напредокот во спроведувањето на договорите постигнати во ноември 2025 година и разговарале за начините за натамошно продлабочување на стратегиското партнерство меѓу двете земји.

Ли истакна дека се согласиле да ја зајакнат конкретната соработка во стратегиските области, вклучително и нуклеарната енергија, одбранбената индустрија и проектот за главниот борбен тенк „Алтај“.

Тој рече дека соработката во врска со проектот за изградба на нуклеарна електрана во Туркије се одвива непречено.

„Надоврзувајќи се на овие достигнувања, потпишавме Меморандум за разбирање за соработка во врска со финансирањето на проектот за нуклеарна електрана“, рече тој.

Ли го истакна и континуираниот развој на соработката во одбранбената индустрија од минатогодишниот самит, потсетувајќи дека заедничкиот комитет за одбранбена индустрија и логистика одржал состанок во јули.

Продлабочување на соработката во одбранбената индустрија

Посочувајќи дека двете земји во септември потпишале писмо за намери за соработка во областа на воените бродови, Ли рече дека ваквите чекори постепено ја прошируваат билатералната соработка.

„Се согласивме да ја продлабочиме соработката во одбранбената индустрија преку зголемување на заедничкото производство и технолошката соработка, како и истражување на можностите компаниите од двете земји заеднички да настапуваат на пазарите во трети земји“, рече тој.

Ли истакна и дека соработката се развила по потпишувањето на минатогодишниот меморандум за разбирање во областа на патната инфраструктура, додавајќи дека новиот договор за транспорт и поврзаност дополнително ќе ја прошири соработката.

„Ќе ги зголемиме инвестициите и стабилноста врз основа на заемна корист и преку зајакнување на економската соработка“, рече тој.

Потсетувајќи дека обемот на трговската размена меѓу Туркије и Јужна Кореја првпат надминал 10 милијарди долари во 2023 година, Ли рече дека билатералната трговија минатата година достигнала рекордно ниво.

„Минатата година обемот на трговијата меѓу Туркије и Јужна Кореја достигна 10,7 милијарди долари, што е рекорд од воспоставувањето на дипломатските односи“, рече тој.

Напори за обезбедување урамнотежена и стабилна трговска соработка

Ли ја нагласи важноста од отстранување на пречките во билатералната трговија и создавање постабилно деловно опкружување.

„Ќе продолжиме со напорите за постепено решавање на трговските нерамнотежи, мерките што го ограничуваат увозот и доцнењата во царинските постапки, обезбедувајќи им постабилни услови за работење на компаниите од двете земји“, рече тој.

„Исто така, се согласивме да ја продолжиме соработката меѓу нашите влади за решавање на прашањата со работните дозволи со кои се соочуваат нашите сонародници.“

Ли рече дека двете земји ќе ја прошират соработката и во биотехнологијата, енергетиката, науката и технологијата, природните ресурси и рударството.

Тој истакна дека ќе продолжат напорите за непречено спроведување на проектот за воспоставување производствен капацитет за лекови добиени од крвна плазма во Туркије, во соработка со јужнокорејската компанија „СК Плазма“.

Ли рече дека двете земји се согласиле да формираат Форум за енергетска транзиција меѓу Јужна Кореја и Туркије, врз основа на Меморандумот за разбирање за зајакнување на соработката во енергетскиот сектор, потпишан за време на самитот.

Тој додаде дека форумот ќе придонесе за проширување на соработката во областа на чистата енергија, водородот и обновливите извори на енергија.

Првпат ќе се состане Заедничкиот комитет за наука и технологија

Ли рече дека новопотпишаниот Меморандум за разбирање за соработка во областа на науката, технологијата и иновациите ќе ја зајакне соработката во вештачката интелигенција, напредните комуникации и напредните материјали.

Тој додаде дека двете земји се согласиле првпат да го свикаат својот билатерален Заеднички комитет за наука и технологија.

Ли го оцени како значајно достигнување и потпишувањето на Меморандумот за разбирање за соработка во областа на природните ресурси и рударството.

Тој рече дека двете земји ќе работат на диверзификација на синџирите на снабдување со критични минерали преку воспоставување меѓувладин канал за соработка и проширување на можностите за билатерална технолошка и инвестициска соработка.

Ли ја истакна и важноста од зајакнување на стратегиската координација за обновување на мирот на Корејскиот Полуостров и меѓународната стабилност.

Тој рече дека на денешниот состанок била потврдена доследната поддршка на турската Влада за политиката на Јужна Кореја кон Северна Кореја.

Проширување на координацијата на мултилатералните платформи

Ли рече дека двете земји се согласиле да соработуваат во обновувањето на мирот на Корејскиот Полуостров.

Како средни сили посветени на меѓународниот поредок заснован врз правила, Турција и Јужна Кореја ќе ја прошират координацијата преку мултилатерални платформи, како што се ОН, Г20 и МИКТА, група составена од Мексико, Индонезија, Јужна Кореја, Туркије и Австралија, додаде тој.

Ли истакна дека тој и Ердоган разговарале и за главните меѓународни прашања, меѓу кои војната меѓу Русија и Украина и состојбата на Блискиот Исток.

Двајцата лидери се согласиле да одржуваат блиска комуникација и соработка, со цел да се поттикне мирно решавање на споровите и обновување на регионалната стабилност, рече тој.

Ли нагласи дека денешниот самит ги потврдил цврстото пријателство и довербата меѓу двете земји и дека ќе остане запаметен како важна пресвртница во унапредувањето на односите меѓу Туркије и Јужна Кореја кон нова иднина.

Тој изјави дека тесно ќе соработува со Ердоган за целосно спроведување на договорите постигнати за време на самитот и за постигнување конкретни резултати.

На крајот Ли изрази надеж дека Јужна Кореја и Туркије- која ја опиша како братска земја- заеднички ќе изградат попросперитетна иднина.