Американскиот производител на чипови Нвидиа ги прекршил антимонополските закони на Кина, соопшти државниот регулатор во понеделник во соопштение за резултатите од прелиминарната истрага, истакнувајќи дека продолжува да ги испитува операциите на американскиот гигант на домашниот пазар.

Истрагата беше отворена во декември, а прелиминарните резултати покажаа дека американската компанија ги прекршила кинеските прописи, соопшти регулаторот во кратко соопштение без да даде детали.

Нвидиа можеби ги прекршила и обврските од условната лиценца за купување на израелската компанија за дизајн на чипови Меланокс Технолоџис за 6,9 милијарди долари се вели во соопштението. Договорот беше завршен во 2020 година откако кинескиот регулатор даде условно одобрение. Тие додаваат дека Државната администрација за регулирање на пазарот ќе продолжи со истрагата.

Според Законот за конкуренција на Кина, компаниите можат да бидат казнети помеѓу еден и десет проценти од нивните годишни приходи од претходната година. Според извештајот на компанијата за фискалната година што заврши на 26 јануари, Нвидиа остварила приход од 17 милијарди долари на кинескиот пазар, што одговара на 13% од нејзините вкупни приходи.

Американската компанија не одговори веднаш на барањето на Ројтерс за коментар за резултатите од прелиминарната кинеска истрага.

Претставниците на САД и Кина отворија нова рунда трговски разговори во Мадрид во неделата, а се очекува разговорите да вклучат чипови, вклучувајќи ги и оние произведени од Нвидиа.

Аналитичарите го сметаат потегот на Кина за стратешки. Тој се совпаѓа со ескалацијата на технолошките тензии - само неколку дена откако Вашингтон стави на црната листа 23 кинески компании - и веројатно има за цел да ја зголеми предноста на Пекинг во преговорите.

Еден експерт го нарече ова „предупредување“ дека континуираните ограничувања на извозот од страна на САД „ќе имаат последици“, сигнализирајќи ја подготвеноста на Кина да им возврати ударот на американските фирми.