Стотици граѓани на Сараево, вклучувајќи средношколци и студенти, се собраа пред Националниот музеј на Босна и Херцеговина за да му оддадат почит на студентот Ердуан Моранкиќ, жртва на трагичната трамвајска несреќа што се случи вчера во главниот град на Босна и Херцеговина, пренесува Анадолу.

На собирот присуствуваа и пријатели на седумнаесетгодишната Ела Јовановиќ, која беше тешко повредена во несреќата, како и бројни граѓани кои сакаа да изразат сочувство до семејството на жртвата и поддршка за повредените.

Собраните рекоа дека бараат одговорност за трагедијата, нагласувајќи го своето негодување од фактот што, и покрај несреќата, старите трамваи сè уште се во сообраќај по улиците на Сараево.

Тие држеа црно-бели фотографии од повредениот млад човек и транспаренти со пораки за поддршка на Ела, но и барања за побезбеден и подобар јавен превоз.

Меѓу пораките беа и оние што ги критикуваа инвестициските приоритети на владата, со пораки дека животот на граѓаните мора да биде над сè. Учесниците нагласија дека не сакаат да молчат, бидејќи, како што истакнаа, тоа би значело прифаќање на моменталната состојба.

Насобраните го блокираа главниот пат во близина на Националниот музеј, на местото каде што се случи несреќата, и му оддадоа почит на жртвата со минута молчење.

Тие ја оценија одлуката на Владата на Кантонот Сараево да не прогласи Ден на жалост како погрешна, а барањето за прогласување Ден на жалост го поддржаа и колегите на починатиот Моранкиќ, студенти на Академијата за ликовни уметности.

За потсетување, несреќата се случи вчера околу пладне, кога трамвај од правец на Железничката станица со голема брзина влезе на раскрсницата во близина на Техничкото училиште, излета од шините и удри во трамвајската станица. Во таа прилика, едно лице загина, а четворица беа повредени. Возачот на трамвајот беше уапсен и под сомнение за тешко кривично дело против безбедноста на јавниот превоз.