Српскиот претседател Александар Вучиќ изјави дека не ја исклучува можноста да се кандидира за премиер на наредните парламентарни избори, но нагласи дека таквата одлука мора да биде и негова лична и одлука на граѓаните.

„Не е ниту време ниту место да се зборува за тоа. Прво, тоа мора да биде моја одлука, дали се чувствувам доволно способен и дали го сакам тоа, а потоа одлука на народот“, изјави Вучиќ пред новинарите во Претседателството на Србија, повикувајќи ги своите сопартијци да не нагаѓаат за неговата евентуална кандидатура, објавија српските медиуми.

Тој рече дека граѓаните сакаат промени, но не, како што рече, „хаос“, туку промени што гарантираат стабилност и безбедност. Додаде дека по 14 години на власт природно е да постои желба за промени, вклучително и меѓу неговите поддржувачи.

Вучиќ призна дека има забелешки за сопствената работа и дека смета дека можел да направи повеќе во некои моменти, но истакна дека се постигнати резултати кои денес се земаат здраво за готово, како што се стабилен курс на динарот, намалување на јавниот долг во однос на бруто-домашниот производ и растот на просечните плати и пензии.

Тој оцени дека на следните избори ќе победи оној кој ќе успее да ги убеди гласачите дека може да донесе стабилност и промени во исто време. Исто така, рече дека сè уште има енергија и мотивација да извршува тешки државни функции.

Предвремените парламентарни избори во Србија, за кои сè повеќе се дискутира во политичките кругови, се очекуваат подоцна оваа година, иако точниот датум сè уште не е официјално потврден.