Во просториите на Куршумли Ан во Скопје синоќа е отворена изложбата „Сведочи“ на фотографот Енгин Узун.

Изложбата се одржува под покровителство на претседателот на Собранието на Северна Македонија, Африм Гаши, во организација на Амбасадата на Туркије во Скопје, Институтот „Јунус Емре“ – Скопје, Халкбанк Скопје и Сојузот на турските невладини организации во Македонија (МАТҮСИТЕБ).

На отворањето присуствуваа претседателот на Собранието Африм Гаши, министерот за правда Јетон Шасивари, министерот за култура и туризам Седат Сулејмани, амбасадорот на Туркије во Скопје Фатих Улусој, градоначалникот на Општина Чаир Изет Меџити, претставници на турските институции и организации во земјата, претставници на локални институции и организации, како и голем број поканети гости.

Гаши во своето обраќање потсети на изреката: „Пред уметничките дела зборовите остануваат неми“, истакнувајќи дека пред делата на Енгин, кого го нарече „мајстор“, тешко е да се пронајдат вистинските зборови со кои би можеле да се опишат неговите уметнички дела.

„И мојата институционална одговорност и моето лично искуство со различни гранки на уметноста денес ме исполнуваат со восхит пред изложените дела. Идејата за оваа изложба се роди во април годинава во Истанбул, кога имав можност да го запознаам мајсторот Енгин не само како уметник, туку и како човек“, рече Гаши.

Амбасадорот Улусој истакна дека фотографијата им овозможува на луѓето да бидат сведоци на приказните, животите и емоциите на луѓето од различни краишта на светот.

„Изложбата на господинот Енгин, преку фотографиите што ги овековечувал во различни делови од светот во текот на годините, ќе нѐ поведе и во минатото, но и кон приказните на земји што можеби никогаш не сме ги виделе и луѓе што никогаш не сме ги запознале“, рече Улусој.

Претседателот на МАТҮСИТЕБ, Тахсин Ибрахим, осврнувајќи се на значењето на изложбата, рече:

„Затоа сме особено горди што една ваква изложба се одржува токму во овој историски град – Скопје.“

Енгин Узун, пак, истакна дека на изложбата се претставени фотографии создадени во текот на неговата триесетгодишна работа.

Изложбата ќе биде отворена за посетителите до 21 јули.