Министрите за надворешни работи на Г7 бараат прекин на нападите врз цивили во војната во Заливот

Министрите за надворешни работи на Г7 повикаа на итен прекин на нападите врз цивили и цивилна инфраструктура во војната во Иран и повикаа на враќање на безбедната пловидба низ Ормускиот теснец.

Во заедничката изјава договорена на вториот ден од состанокот на Г7 во францускиот град О-де-Серне, министрите на Г7 ја нагласија важноста од минимизирање на влијанието на конфликтот врз регионалните партнери, цивилното население и критичната инфраструктура.

„Се фокусиравме на вредноста на различните партнерства, иницијативи за координација и поддршка, вклучително и ублажување на глобалните економски шокови како што се прекините во комерцијалните синџири на снабдување што ги опфаќаат економскиот, енергетскиот и комерцијалниот сектор и имаат директно влијание врз нашите граѓани“, стои во соопштението до кое увид има Ројтерс.

Министрите, исто така, ја повторија потребата од враќање на безбедната, слободна пловидба низ Ормускиот теснец.

Членовите на Г7 се САД, Велика Британија, Канада, Франција, Германија, Италија и Јапонија. Европската Унија е исто така постојана членка, учествува на сите состаноци, но не претседава ниту е домаќин на самитот.

Оваа година, земја домаќин на самитот на Г7 е Франција.