Израелскиот премиер Нетанјаху потврди дека има договор за примирје во Газа и ослободување на заложниците. Претходно неговиот безбедносен кабинет тврдеше дека Хамас отстапил од дел од договореното, во однос на ослободување и размена на заробениците. Нетанјаху рече дека ќе го свика кабинетот, а потоа и владата за да го одобри договорот. 

Израелската екстремна десница предводена од министерот за национална безбедност Итамар Бен-Гвир сака да го блокира договорот за примирје во Газа под закана дека ќе ја напушти владата. Бен-Гвир тврди дека договорот е непромислен и ги поткопува воените достигнувања на Израел со ослободување на палестински борци и стратешки отстапки од терен. 

Светската здравствена организација проценува дека за обнова на здравствениот систем на Газа ќе бидат потребни околу 10 милијарди долари во следните пет години. Речиси сите болници беа погодени од војната и затоа неопходна е постојана хуманитарна помош. Гебрејесус го поздрави договорот за примирје во Газа кој мора да се спроведе. 

За време на ненадејната посета на Киев, британскиот премиер Стармер и украинскиот претседател Зеленски потпишаа „100-годишно партнерство“. Целта на договорот е да ја продлабочи одбранбената соработка, да одговори на предизвиците по поморската безбедност и да ги зајакне врските во областите како што се трговијата, енергијата и климатските промени. 

И за крај на денешниот блиц...

Новиот пробен лет на вселенското летало на Спејс Екс заврши неуспешно откако експлодираше во воздух неколку минути по полетувањето. Ракетата имаше силно лансирање, но потоа излезе од контрола поради протекување на кислород. Со Старшип треба да бидат лансирани главните мисии на компанијата за освојување на Марс, и Месечината како попатна станица. 

Тоа е се за денешните блиц вести. За повеќе посетете нѐ на macedonian.trtbalkan.com