САД најавуваат можна проширена воена операција во Иран; Кина апелира до Вашингтон да ги укине едностраните царини. Мексико повикува на смиреност по ликвидацијата на „Ел Менчо“, честитката на Кси до Ким за реизборот. Трамп бара Нетфликс да ја отпушти Сузан Рајс

Слушате Блиц вести на ТРТ Балкан на македонски, денеска е понеделник 23 февруари

САД би спровеле проширена воена операција во Иран ако пропаднат нуклеарните преговори

Претседателот Доналд Трамп размислува за почетен насочен воен напад врз Иран и би можел да преземе пошироки мерки насочени кон соборување на раководството на земјата доколку дипломатските напори не успеат, објави во неделата „Њујорк тајмс“, повикувајќи се на американски претставници запознаени со внатрешните разговори. Според весникот, Трамп им рекол на советниците дека ќе размисли за поширока воена акција во наредните месеци доколку преговорите и евентуалниот ограничен удар не го убедат Техеран да се откаже од својата нуклеарна програма.

Кина со апел до САД да ги укинат едностраните царини

Кина ги повика САД да ги откажат едностраните царински мерки наметнати врз нивните трговски партнери по одлуките на Врховниот суд на САД со кои се поништени повеќекратните царини наметнати од претседателот Доналд Трамп, објавија државните медиуми. Портпаролот на кинеското Министерство за трговија изјави дека Пекинг постојано се спротивставува на едностраните зголемувања на тарифите и тврди дека нема победници во трговската војна, според „Глобал тајмс“.

Мексико повикува на смиреност по воената ликвидација на нарко шефот „Ел Менчо“

Мексиканската претседателка Клаудија Шајнбаум изјави дека постои „апсолутна координација“ со сите државни институции по воената ликвидација на лидерот на картелот „Нова генерација на Халиско“, Немесио Осегера Сервантес, познат како „Ел Менчо“. „Постои апсолутна владина координација; мора да останеме информирани и смирени“, рече претседателката Шајнбаум, додавајќи дека „активностите се одвиваат нормално низ поголемиот дел од Мексико“.

Кси му честита на севернокорејскиот лидер Ким за реизборот за лидер на владејачката партија

Кинескиот претседател Кси Џинпинг во понеделник му честиташе на севернокорејскиот лидер Ким Џонг Ун за реизборот за генерален секретар на владејачката Работничка партија на Кореја, објавија државните медиуми. Кси, кој е и генерален секретар на Централниот комитет на Комунистичката партија на Кина, изјави дека е подготвен да соработува со Ким за да „напише ново поглавје“ во пријателството меѓу Кина и Северна Кореја, објави пекиншката новинска агенција „Синхуа њуз“.

И за крај на денешниот блиц…

Трамп повика Нетфликс да ја отпушти членката на одборот Сузан Рајс

Американскиот претседател Доналд Трамп ја повика стриминг-платформата Нетфликс итно да ја разреши членката на својот одбор Сузан Рајс или „да ги сноси последиците“. За време на интервјуто Рајс предупреди дека некои компании, за кои тврдеше дека попуштиле под притисокот на републиканците, не треба да очекуваат благонаклонетост од демократите доколку повторно ја преземат власта.

Тоа е сѐ за денешните блиц вести. За повеќе посетете нѐ на macedonian.trtbalkan.com