Кина апелира САД да се воздржат од нуклеарни тестови; Нов Зеланд воведува забрани за патување за ирански функционери поради наводни кршења на човековите права. Унгарија и Србија ја зајакнуваат енергетската соработка. Трамп зборува за пронајдени тела во Газа. Турски Ф-16 се урна во Баликесир.

Слушате Блиц вести на ТРТ Балкан на македонски, денеска е среда 25 февруари

Кина апелира САД да се воздржи од нуклеарни тестови

Кина упати апел до САД да се придржуваат до мораториумот за нуклеарни тестирања и ги отфрли обвинувањата дека Пекинг извршил нуклеарни тестови во 2020 година. „Вашингтон да го почитува глобалниот консензус за забраната за нуклеарни тестирања и да престане да наоѓа изговори за продолжување на нуклеарните тестирања“, повика портпаролката на Министерството за надворешни работи, Мао Нинг.

Нов Зеланд воведува забрани за патување за ирански функционери за наводни кршења на човековите права

Нов Зеланд денес објави санкции и забрани за патување за неколку ирански министри и функционери поради наводните убиства на луѓе за време на неодамнешните протести низ целата земја. Министерот за надворешни работи Винстон Питерс рече дека забраната за патување е насочена кон 40 лица, вклучувајќи го министерот за внатрешни работи Ескандар Момени, министерот за разузнавање Есмаил Хатиб и генералниот обвинител Мохамед Мовахеди-Азад.

Сијарто: Eнергетскиот сојуз на Унгарија и Србија го зајакнува регионот

Унгарија и Србија се согласија да ги забрзаат подготвителните работи за изградба на нафтовод меѓу двете земји, со цел зајакнување на безбедноста на снабдувањето и поголема енергетска стабилност во регионот, изјави унгарскиот министер за надворешни работи и трговија Петер Сијарто. По средбата со српската министерка за енергетика Дубравка Ѓедовиќ-Хандановиќ во Вашингтон, тој рече дека штом унгарската компанија МОЛ го финализира купувањето на Српската нафтена индустрија (НИС), нафтените пазари на Словачка, Унгарија и Србија ќе работат во хармонија.

Трамп вели дека биле пронајдени стотини тела во потрагата по заложници во Газа

Претседателот на САД, Доналд Трамп, вчера изјави дека при потрагата по телата на починатите заложници во Појасот Газа, за секое пронајдено тело на починат заложник биле откривани до стотина други тела во урнатините на палестинската територија. „Верувале или не, Хамас соработуваше со Израел, копаа и копаа и копаа. Тоа е тешка работа, насекаде да се минува низ тела, понекогаш поминуваа покрај стотина тела за секое едно што го наоѓаа“, рече Трамп за време на неговото годишно обраќање за состојбата на нацијата.

И за крај на денешниот блиц…

Турски борбен авион Ф-16 се урна во Баликесир, пилотот загина

Турски борбен авион Ф-16 се урна во западната покраина Баликесир, при што загина пилотот, соопшти Министерството за национална одбрана. Радио контактот и информациите за следење биле изгубени со авионот, кој полетал од 9-та команда на воздухопловната база во Баликесир во 00:56 часот по локално време, соопшти турското министерство за одбрана.

Тоа е сѐ за денешните блиц вести. За повеќе посетете нѐ на macedonian.trtbalkan.com