САД ја продлабочуваат соработката со Саудиска Арабија, Израел спроведе масовни приведувања на Западниот Брег, Вашингтон и Москва тајно работат на план за Украина, Мадуро подготвен за директни разговори со САД. Туркије се подготвува за првата недела на е-трговија во Истанбул.
Слушате Блиц вести на ТРТ Балкан на македонски, денеска е среда, 19 ноември
Трамп: Саудиска Арабија е главен сојузник на САД надвор од НАТО
Претседателот на САД, Доналд Трамп, на вечера со саудискиот престолонаследник Мохамед бин Салман, изјави: „Ја креваме нашата воена соработка на уште поголеми височини со формално означување на Саудиска Арабија како главен сојузник надвор од НАТО, што е нешто што е многу важно за нив“. Објавата би можела да го отвори патот за понатамошна безбедносна соработка меѓу двете земји, вклучително и полесен пристап до американска воена опрема.
Израелската армија приведе 100 Палестинци во рација на Западниот Брег
Израелската армија приведе околу 100 Палестинци во градот Беит Умар, северно од Хеброн во јужниот окупиран Западен Брег, откако ги затвори сите влезови во градот рано во среда. Операцијата се случи неколку часа откако еден израелски доселеник беше убиен, а тројца други беа ранети, еден критично, во напад со удирање и избодување на раскрсницата Гуш Ецион во јужниот Западен Брег. Нападот го извршија двајца Палестинци, еден од нив од Беит Умар, кои беа застрелани од израелските сили.
САД и Русија тајно работат на нов план за завршување на војната во Украина
Администрацијата на американскиот претседател Доналд Трамп тајно работи, во консултација со Русија, на нов план за завршување на војната во Украина, изјавија денес американски и руски претставници за Аксиос. Планот на САД од 28 точки наводно се базира на иницијативата на Трамп за постигнување договор за Газа. Висок руски функционер изјави дека е „оптимист“ за успехот на предлогот, иако сè уште не е јасно како ќе биде прифатен од Украина и нејзините европски сојузници.
Мадуро: Подготвен сум за разговори со САД
Претседателот на Венецуела Николас Мадуро синоќа изјави дека е подготвен да разговара „лице в лице“ со претставници на администрацијата на американскиот претседател Доналд Трамп. Мадуро повика на дипломатија наместо конфронтација, додека носач на авиони на американската морнарица им се придружи на речиси десетина други воени бродови на САД покрај брегот на неговата земја во напната ситуација, објави Си-Би-Ес.
И за крај на денешниот блиц…
Туркије ја започнува првата недела на е-трговија во Истанбул
Туркије ќе ја започне својата прва Недела на е-трговија во Истанбул во петок, со цел да ја зајакне соработката низ целиот сектор, да ги претстави иновативните решенија и да го прошири економскиот и социјалниот отпечаток на дигиталната трговија. Организиран од Министерството за трговија со поддршка од Здружението на оператори за електронска трговија (ETID) и Унијата на комори и берзи на стоки (TOBB), дводневниот настан ќе се одржи од 21 до 22 ноември во Конгресниот центар „Лутфи Кирдар“ во Истанбул.
Тоа е сѐ за денешните блиц вести. За повеќе посетете нѐ на macedonian.trtbalkan.com