Иран собори два израелски дронови над Техеран, додека лидерот на Хезболах најави поддршка за Иран и дејства против Израел. Русија изврши напад врз Одеса, а Јапонија пријави една смрт и 100 хоспитализирани поради високите температури.

Слушате Блиц вести на ТРТ Балкан на македонски, денеска е петок, 20 јуни

Иранските сили соборија 2 израелски дронови над Техеран

Иранските сили соборија две израелски беспилотни летала (БЛН) над Техеран, главниот град на земјата, објавија иранските медиуми во петокот. Камиказе дрон беше уништен во областа Шахр-е Реј, јужно од Техеран, а мини дрон беше соборен во близина на рафинеријата за нафта во Техеран, објави локалната новинска агенција Мехр, повикувајќи се на соопштение на Корпусот на Исламската револуционерна гарда (ИРГЦ).

Лидерот на Хезболах со поддршка до Иран, ветува дека ќе дејствува соодветно против израелските сили

Генералниот секретар на Хезболах, Наим Касем, во четврток изјави дека групата со седиште во Либан не е неутрална и стои зад Иран во неговиот конфликт со Израел. „Хезболах и Исламскиот отпор не се неутрални кон легитимните права и независност на Иран и лагите на Америка, нејзината агресија, заедно со канцерогениот тумор на Израел и арогантните сили“, рече Касем во изјава на Телеграм.

Русија изврши напад врз украинскиот град Одеса, повредени се 11 лица

Руските сили извршија масовен напад со беспилотни летала врз јужниот украински пристаништен град Одеса, при што се повредени најмалку 11 лица, соопшти Државната служба за итни ситуации на Украина. Меѓу повредените се и тројца пожарникари, кои се здобиле со повреди од паѓање на делови од згради додека работеле на последиците од нападите.

Русија и Казахстан се договорија за план за изградба на нуклеарна централа

Русија и Казахстан во петокот постигнаа договор и потпишаа документи со кои се утврдува временска рамка за изградба на нуклеарна централа во Казахстан. Спогодбата ја потпишаа Алексеј Лихачев, генерален директор на руската корпорација за атомска енергија „Росатом“, и Алмасадам Саткаљев, претседател на Казахстанската агенција за атомска енергија, на церемонија одржана за време на Меѓународниот економски форум во Санкт Петербург, објави новинската агенција РИА „Новости“.

И за крај на денешниот блиц...

Едно лице почина, 100 се хоспитализирани поради високите температури во Јапонија

Едно лице почина, а 100 се хоспитализирани поради високите температури што ја погодија Јапонија, објавија локалните медиуми денес. Според јавниот сервис НХК, 100 лица на возраст од 11 до 97 години биле однесени во болница во Токио во четврток со сомнителни симптоми на топлотен удар.

Тоа е сѐ за денешните блиц вести. За повеќе посетете нѐ на macedonian.trtbalkan.com