Слушате дневни Блиц вести, денеска е четврток, 23 јули

Претставничкиот дом на САД одобри рекордни 1,15 билиони долари за воени трошоци

Претставничкиот дом на Конгресот на Соединетите Американски Држави тесно ја усвои својата верзија на Законот за национална одбрана (НДAA) за фискалната 2027 година, со кој се одобруваат рекордни 1,15 билиони долари воени трошоци.

За законот 216 пратеници гласаа „за“, додека 212 беа „против“.

Гласањето беше во голема мера по партиски линии, при што мнозинството републиканци ја поддржаа мерката, додека мнозинството демократи гласаа против неа.

Лавров и Рубио ги завршија разговорите во Манила

Средбата меѓу министрите за надворешни работи на Русија и Соединетите Американски Држави, Сергеј Лавров и Марко Рубио, заврши во Манила, на маргините на самитот на АСЕАН, објави Спутник.

Разговорите траеле повеќе од половина час.

Руското Министерство за надворешни работи објави дека Лавров го информирал својот американски колега за ситуацијата на линијата на поделба на фронтот во Украина и нагласил дека понатамошното вооружување на Киев е неприфатливо.

Иран продолжи со нападите врз воени објекти на САД во Јордан и Кувајт

Иранската Исламска револуционерна гарда извршила напади врз американските воени бази во Кувајт и Јордан, пренесе иранската државна телевизија ИРИБ.

Гардата соопшти дека во нападите уништиле американски систем за воздушна одбрана „Патриот“ и хангар во кој биле сместени беспилотни летала Ем Кју 9 во воздухопловната база „Али ал Салем“ во Кувајт.

Исто така, се тврди дека погодиле два хангари за хеликоптери во кампот Удаири, „убивајќи и ранувајќи“ неодреден број американски војници.

Двајца загинати во американски напад врз граничен премин меѓу Иран и Ирак

Две лица загинале, а 11 се повредени во американскиот напад на граничниот премин Шаламчех во Иран рано утрово, објави иранската новинска агенција Мехр.

Валиолах Хајати, заменик-гувернер за безбедност и спроведување на законот во југозападната покраина Хузестан, изјави дека цел на нападот била областа околу патничкиот терминал на граничниот премин.

Централната команда на САД (ЦЕНТКОМ) соопшти дека операциите ќе продолжат да ја деградираат способноста на Иран да им се заканува на цивилните морнари и комерцијалните бродови во регионалните води.

И за крај на денешниот блиц…

Судењето на Николас Мадуро закажано за 1 јуни 2027 во САД

Окружниот судија на САД, Алвин Хелерштајн го закажа судењето на венецуелскиот претседател Николас Мадуро и неговата сопруга, Силија Флорес, за 1 јуни 2027 година.

Судијата го објави датумот за време на третото појавување на двојката пред суд откако беа заробени од американските специјални сили во Каракас во јануари.

Тие се соочуваат со обвиненија за наркотероризам и трговија со дрога, а обвинителите тврдат дека соработувале со нарко-картели за да пренесат илјадници тони кокаин во Соединетите Држави.

Тоа е сѐ за денешните блиц вести. За повеќе информации следете нѐ на социјалните мрежи