Напнатостите меѓу Индија и Пакистан повторно се во ескалација со десетици жртви, додека светските лидери повикуваат на воздржаност — а Киев и денес брои жртви по нов руски напад
Слушате Блиц вести на ТРТ Балкан на македонски, денеска е среда, 7 мај
26 лица загинаа, а 46 се повредени во индиските напади, Пакистанската армија изјавува
Портпаролот на пакистанската војска, Ахмед Шариф Чаудри, денес потврди дека бројот на жртви во индиските ракетни напади врз шест локации во Пакистан се искачи на 26 и дека 46 лица се повредени во тие напади. Еден ден пред нападот, Медиумскиот тим на Пакистанската армија (ИСПР) им понуди на меѓународните новинари да ги посетат Муритка и Бахавалпур, бидејќи Индија го обвини Пакистан дека им нуди засолниште на терористи во тие области.
Гутереш: Светот не може да си дозволи воена конфронтација меѓу Индија и Пакистан
Генералниот секретар на ОН, Антонио Гутереш, синоќа повика на максимална воена воздржаност и од Индија и од Пакистан и нагласи дека „светот не може да си дозволи воена конфронтација“ меѓу двете земји. Портпаролот на генералниот секретар на ОН, Стефан Дижарик, изјави дека Гутереш е многу загрижен за индиските воени операции преку Линијата на контрола, де факто границата меѓу деловите на Кашмир под контрола на Индија и Пакистан, како и преку меѓународната граница на двете земји, пренесуваат медиумите.
Шариф: Пакистан дава соодветен одговор на чинот на војна наметнат од Индија
Премиерот на Пакистан, Шехбаз Шариф, рано наутро во среда изјави дека индиските ракетни напади врз пакистанските градови и територијата Кашмир, која е под пакистанска администрација, се „кукавички напад“ и дека Исламабад дава „соодветен одговор“ на „чинот на војна“ извршен од Индија. Индија претходно соопшти дека извршила ракетни напади врз девет локации во Пакистан и територијата Кашмир, која е под пакистанска администрација.
Трамп: Штета е што Индија го нападна Пакистан
Американскиот претседател Доналд Трамп изјави дека е „штета“ што Индија го нападна Пакистан синоќа и оти се надева дека конфликтот ќе заврши брзо, додека американскиот државен секретар Марко Рубио изјави дека внимателно ја следат ситуацијата. Тој ги повтори зборовите на американскиот претседател Доналд Трамп дека се надева дека „ова ќе заврши брзо“.
Две лица загинаа во рускиот напад врз Киев
Градоначалникот на Киев, Виталиј Кличко, објави на Телеграм дека беспилотни летала ги погодиле горните катови на станбена зграда во Шевченковската област во главниот град. Кличко изјави дека вкупно седум лица се повредени, меѓу кои и четири деца. Тројца од повредените се хоспитализирани, додека четворица добиле лекарска помош на лице место. За време на нападот, во неколку области на Киев избувнаа пожари, кои брзо се проширија.
Тоа е сѐ за денешните блиц вести. За повеќе посетете нѐ на macedonian.trtbalkan.com