Турски Ф-16 собори дрон во Црното Море, ЕУ санкциите кон Венецуела беа осудени како „нелегални“; израелските сили убија палестински тинејџер на Западниот Брег. САД извршија напади врз три брода во Источен Пацифик; премиерот Албанезе се сретна со херојот кој го разоружа напаѓачот на плажата Бонди.

Слушате Блиц вести на ТРТ Балкан на македонски, денеска е вторник, 16 декември

Турски Ф-16 собори дрон во Црното Море

Туркије собори дрон „надвор од контрола“ кој се приближувал кон нејзиниот воздушен простор над Црното Море, објави Министерството за одбрана во Анкара. Во соопштението издадено во понеделник се вели дека ловците Ф-16 биле подигнати откако бил откриен објектот, според турските медиуми. „За да се избегне каква било потенцијална штета, тој бил соборен во безбедна зона надвор од населените области“, се додава во соопштението.

Венецуела го осудува обновувањето на санкциите на ЕУ како „нелегално“ и „непријателско“

Владата на Венецуела остро го отфрли обновувањето на санкциите од страна на ЕУ и го опиша како еднострани принудни мерки против земјата. Министерството за надворешни работи ги опиша мерките во соопштението објавено во понеделник како „нелегитимни, нелегални и спротивни на меѓународното право“, поврзувајќи ја одлуката на Брисел со „непредвидлива надворешна политика“. „Лидерите на тој блок за жал избраа да го забрзаат сопствениот политички пад инсистирајќи на линија на стерилно непријателство против Венецуела“, се вели во соопштението на владата на претседателот Николас Мадуро.

Израел уби палестински тинејџер во окупираниот Западен Брег

Израелските сили застрелале палестински тинејџер за време на напад во градот Туку, источно од Витлеем, во окупираниот Западен Брег. Официјалната новинска агенција ВАФА, повикувајќи се на Таисир Абу Муфрех, шеф на Општинскиот совет на Туку, во понеделник соопшти дека 17-годишно момче било застрелано во градите од страна на израелски војници. Абу Муфрех рече дека израелските сили го нападнале градот, зазеле позиции во неговиот центар и отвориле оган неселективно, што резултирало со смртта на тинејџерот.

САД извршија напади врз три бродови во Источен Пацифик

Јужната команда на САД соопшти дека извршила кинетички напади врз три брода во Источен Пацифик, при што загинале осум лица. „На 15 декември, по наредба на министерот за војна Пит Хегсет, Заедничката работна група Јужно копје (Southern Spear) изврши смртоносни кинетички напади врз три брода управувани од назначени терористички организации во меѓународни води“, соопшти Јужната команда на САД во понеделник на X.

И за крај на денешниот блиц…

Премиерот Албанезе се сретна со глобалниот херој Ахмед кој го разоружа напаѓачот на плажа

Австралискиот премиер Ентони Албанезе во вторник ја посети болницата „Сент Џорџ“ во јужен Сиднеј, каде што се сретна со Ахмед Ал Ахмед, човекот кој е прогласен за херој за разоружување на еден од напаѓачите за време на инцидентот на плажата Бонди. По средбата, Албанезе ја пофали храброста на Ахмед, велејќи дека тој го претставува „најдоброто од нашата земја“.

Тоа е сѐ за денешните блиц вести. За повеќе посетете нѐ на macedonian.trtbalkan.com