Градскиот плоштад во Тетово е преуреден во терен за одбојка на песок. Градот под Шара е домаќин на Балканскиот шампионат во одбојка на песок за одбојкари и одбојкарки до 22 години.

Осум екипи во машка конкуренција и седум женска од земајва, како и од Албанија, Косово, Туркије, Романија и Молдавија го пријавија учеството на Балканијадата. Натпреварувањето е во организација на Македонската одбојкарска федерација (ОФМ) заедно со локалните власти, а се одржува од 25 до 27 јуни.

Покрај реткиот спектакл за тетовчани, овој турнир има и значајна натпреварувачка вредност: победничкиот тим обезбедува „билет“ за учество на Европското првенство во одбојка на песок.