Sipas tre burimeve izraelite me njohuri për çështjen, Izraeli është në gjendje gatishmërie të lartë për mundësinë e një veprimi ushtarak amerikan kundër Iranit, ndërsa autoritetet atje po përballen me protesta kundër qeverisë.
Të shtunën, Trump tha se ShBA-ja është “gati të ndihmojë”.
Burimet, të cilat ishin të pranishme në konsultimet e sigurisë izraelite gjatë fundjavës, nuk sqaruan se çfarë nënkupton në praktikë kjo gjendje e lartë gatishmërie e Izraelit.
Izraeli dhe Irani zhvilluan një luftë 12-ditore në qershor, gjatë së cilës ShBA-ja iu bashkua Izraelit në kryerjen e sulmeve ajrore.
Në një telefonatë të shtunën, kryeministri izraelit Benjamin Netanyahu dhe sekretari amerikan i Shtetit Marco Rubio diskutuan mundësinë e një ndërhyrjeje amerikane në Iran, sipas një burimi izraelit që ishte i pranishëm në bisedë. Një zyrtar amerikan konfirmoi se të dy kanë folur, por nuk bëri të ditur temat e diskutuara.
Në një intervistë për The Economist, të publikuar të premten, Netanyahu tha se do të kishte pasoja të tmerrshme për Iranin nëse ai do të sulmonte Izraelin. Duke iu referuar protestave, ai shtoi: “Për gjithçka tjetër, mendoj se duhet të shohim se çfarë po ndodh brenda Iranit”.
