Zëdhënësi i Kremlinit, Dmitry Peskov, deklaroi të mërkurën se raundi i ardhshëm i bisedimeve mes Rusisë, Ukrainës dhe ShBA-së mund të zhvillohet në Stamboll.

Duke folur në një konferencë për shtyp në Moskë, Peskovi theksoi se të gjithë pjesëmarrësit në negociatat për Ukrainën kanë një qëndrim pozitiv ndaj Stambollit si platformë për zhvillimin e bisedimeve, prandaj konsultimet mund të vazhdojnë në metropolin më të madh turk.

“Sigurisht që ekziston opsioni i Stambollit dhe të gjitha palët kanë një qëndrim shumë pozitiv ndaj tij”, tha ai.

Peskovi falënderoi gjithashtu udhëheqjen e Emirateve të Bashkuara Arabe për ndihmën në organizimin e raundeve të mëparshme të bisedimeve dhe për atmosferën e krijuar gjatë tyre.

“Sigurisht, të gjithë e vlerësojnë shumë atmosferën që autoritetet e Emirateve krijuan për këto negociata trepalëshe dhe mbeten mirënjohës ndaj udhëheqjes së Emirateve të Bashkuara Arabe për ndihmën në organizimin e procesit të negociatave”, u shpreh ai.

Duke folur për ndërprerjet e internetit në Rusi, Peskovi bëri me dije se ato do të vazhdojnë “për aq kohë sa të jetë e nevojshme” për të garantuar “sigurinë”.