Presidenti Recep Tayyip Erdoğan ka theksuar se Türkiye po merr përgjegjësi të guximshme në procesin për një Türkiye pa terror, që synon t’i japë fund dhunës disadekadëshe që e ka penguar vendin.

“Me nisjen e procesit për një Türkiye pa terror, ne kemi vënë jo vetëm duart, por tërë trupin tonë në rrezik, për të coptuar sa më shpejt prangat e përgjakshme gjysmëshekullore që i janë lidhur këmbëve të kombit tonë”, tha Erdoğan në një takim me guvernatorët në Ankara, të mërkurën.

Presidenti theksoi se, pavarësisht përpjekjeve për ta sabotuar këtë proces, Ankaraja e ka menaxhuar atë për 16 muaj me “ndjeshmëri të madhe dhe sukses të jashtëzakonshëm”.

“Institucionet tona përkatëse vazhdojnë t’i kryejnë detyrat e tyre në terren me kujdes dhe në koordinim”, shtoi ai.

Erdoğan vuri në dukje se, me zgjidhjen pa probleme të çështjes në Sirinë veriore, rruga e Türkiyes do të bëhet edhe më e qartë, duke theksuar se vendi do të vazhdojë të ofrojë mbështetje brenda kornizës së vëllazërisë dhe marrëdhënieve të mira fqinjësore.

Ai gjithashtu theksoi se Komisioni për Solidaritet Kombëtar, Vëllazëri dhe Demokraci, i themeluar pranë Parlamentit, e përfundoi raportin e tij të mërkurën me mbështetjen e të gjitha grupeve politike.

Presidenti falënderoi deputetët dhe kontribuuesit për bashkëpunimin e tyre, duke vlerësuar rolin udhëheqës të Parlamentit dhe duke thënë se raporti konsensual ofron një udhërrëfyes kyç, ndërsa diskutimet ligjore do të nisin më pas.

Erdoğan tha se do të ndërmerren hapa të caktuar drejt shpërbërjes së plotë të organizatës terroriste që ka deklaruar se po dorëzon armët, duke iu referuar grupit terrorist PKK/YPG.

“Kështu, fillimisht do ta bëjmë realitet një Türkiye pa terror dhe, shpresojmë, më pas do të ndërtojmë edhe një rajon pa terror”, theksoi Erdoğan.

‘Do t’i arrijmë synimet hap pas hapi’

Erdoğan nënvizoi se guvernatorët, veçanërisht ata në rajonet kufitare, kanë përgjegjësi të rëndësishme për vijimin e qetë të këtij procesi.

Ai theksoi domosdoshmërinë e vigjilencës së lartë të sigurisë dhe bashkëpunimit për të parandaluar provokimet, ndërsa Türkiye i afrohet një të ardhmeje pa terror.

“Përmes harmonisë ndërmjet administratës qendrore, pushtetit vendor dhe shoqërisë civile, ne do t’i arrijmë synimet tona hap pas hapi. Do ta ruajmë fuqishëm trashëgiminë e dëshmorëve tanë heroikë dhe do të respektojmë ndjeshmëritë e veteranëve dhe familjeve të dëshmorëve”.

Erdoğan shprehu gjithashtu shpresën se muaji i shenjtë i Ramazanit do të kontribuojë në zgjimin e botës islame dhe falënderoi guvernatorët për shërbimin e tyre.

Ai u bëri thirrje zyrtarëve që të arrijnë në mënyrë proaktive te qytetarët vulnerabël me mbështetje të shpejtë dhe humane, në mënyrë që asnjë familje të mos mbetet në vështirësi.

Presidenti shtoi se ata janë një ekip i përqendruar në problemet e kombit dhe se kanë punuar pa u lodhur që nga marrja e detyrës, me miratimin e popullit, për të siguruar një të ardhme të begatë dhe të lumtur për të gjithë 86 milionë qytetarët.

PKK-ja, e shpallur organizatë terroriste nga Türkiye, ShBA-ja dhe BE-ja, njoftoi shpërbërjen e saj vitin e kaluar, pas thirrjes së shkurtit 2025 nga udhëheqësi i saj i burgosur, Abdullah Ocalan, për t’i dhënë fund sulmeve disa dekadëshe.

Më 11 korrik 2025, një grup prej 30 terroristësh të PKK-së, përfshirë 15 gra, u dorëzuan dhe shkatërruan armët e tyre në provincën Sulaymaniyah të Irakut, duke i hedhur ato në një kazan të ndezur.

Në kuadër të nismës së re, Parlamenti i Türkiyes krijoi Komisionin për Solidaritet Kombëtar, Vëllazëri dhe Demokraci për t’i vlerësuar aspektet politike dhe ligjore të epokës pas terrorit.