Tregu i komunikimeve elektronike në Shqipëri po hyn në një fazë të re, ku interneti, veçanërisht ai celular, po merr rolin kryesor në komunikimin e përditshëm. 

Të dhënat më të fundit tregojnë se përdoruesit po largohen gradualisht nga shërbimet klasike, si SMS-të dhe telefonia fikse, duke u orientuar drejt zgjidhjeve digjitale.

Sipas raportit të Autoritetit të Komunikimeve Elektronike dhe Postare (AKEP) për tremujorin e tretë të vitit 2025, përdorimi i internetit në celular vijon të rritet me ritme të qëndrueshme.

Aktualisht, rreth 2,4 milionë persona përdorin internetin përmes telefonit, ndërsa shërbimet e telefonisë celulare numërojnë 2,72 milionë përdorues, duke shënuar rritje krahasuar me periudhën e mëparshme.

Në të njëjtën kohë, tregu po tregon shenja konsolidimi. 

Numri i kartave SIM aktive ka arritur në 3,4 milionë, çka sinjalizon një ulje të përdorimit paralel të disa kartave nga i njëjti abonent dhe një stabilizim të përgjithshëm të sektorit.

Vetëm gjatë tremujorit të tretë janë shfrytëzuar 73 milionë gigabajt internet celular, një nivel dukshëm më i lartë se në tremujorin e dytë dhe në të njëjtën periudhë të vitit të kaluar. 

Konsumi mesatar mujor për përdorues tashmë i kalon 10 gigabajtët, duke dëshmuar se platformat onlajn, rrjetet sociale dhe aplikacionet e komunikimit janë bërë pjesë qendrore e jetës digjitale.

Ndërkohë, shërbimet tradicionale vazhdojnë të humbasin rëndësi. 

Thirrjet telefonike mbeten në nivele të qëndrueshme, por përdorimi i SMS-ve është në rënie të vazhdueshme, si pasojë e kalimit masiv drejt aplikacioneve të mesazheve përmes internetit. 

Edhe struktura e tregut mbetet e pandryshuar, me shumicën e thirrjeve që realizohen brenda të njëjtit rrjet.

Raporti i AKEP-it evidenton gjithashtu se përdoruesit po preferojnë gjithnjë e më shumë paketa të dedikuara vetëm për internet, duke lënë pas ofertat e kombinuara me telefon dhe televizion, një tregues i qartë i ndryshimit të prioriteteve në komunikim.