Presidenti i Türkiyes, Recep Tayyip Erdoğan, dhe Presidenti i ShBA-së, Donald Trump, zhvilluan një bisedë telefonike “shumë pozitive”, bëri të ditur Ministri i Jashtëm i Türkiyes, Hakan Fidan, gjatë një iftari me gazetarët.

Fidan theksoi se Presidenti Trump duhet të bindet për tërheqjen e trupave amerikane nga Siria, duke shtuar se një veprim i tillë do të ishte më pak i kushtueshëm për Uashingtonin.

Ministri turk deklaroi se Türkiye është e kujdesshme ndaj marrëveshjes së nënshkruar midis Presidentit sirian Ahmad al-Sharaa dhe Ferhat Abdi Sahin dhe se vendi do ta monitorojë nga afër procesin në afatin e shkurtër.

Ai gjithashtu nënvizoi se të drejtat e mohuara ndaj kurdëve të Sirisë nën regjimin e rrëzuar të Asadit duhet të garantohen, përfshirë shtetësinë, të drejtat kulturore dhe politike, duke siguruar barazi.

Duke folur për situatën në rajon, Fidan bëri thirrje që Siria të përqendrohet në mënyrat për të larguar Izraelin nga territori sirian dhe të menaxhojë këtë proces në bashkëpunim me komunitetin ndërkombëtar.

Në vijim, ai njoftoi se pesë vende janë takuar në Jordani për të krijuar një qendër operacionale të përbashkët dhe për inteligjencë kundër ISIS-it (Daesh), me ekipet teknike që aktualisht po punojnë për ngritjen e saj.

Lidhur me luftën në Ukrainë, Fidan deklaroi se Türkiye mund të kontribuojë në një forcë paqeruajtëse “nëse palët bien dakord për krijimin e saj” për zgjidhjen e konfliktit në një fazë të ardhshme.

Në fund, ministri theksoi rëndësinë e liberalizimit të vizave me Evropën, duke argumentuar se sistemi aktual nuk mund të përmbushë kërkesën në rritje të Türkiye-s, ndërsa kufizimet mbeten ende në fuqi.