Në mbarë botën, rreth 251 milionë fëmijë dhe të rinj ende nuk kanë qasje në arsim, tha të premten zonja e parë e Türkiyes, Emine Erdoğan, në Samitin e 5-të të Arsimit në Istanbul.

Forumi mblodhi për dy ditë së bashku politikëbërës, akademikë, mësues, studiues, opinionistë dhe përfaqësues të shoqërisë civile nga vende të ndryshme për të diskutuar çështje bashkëkohore në arsim.

Samiti vjetor, i organizuar nga Fondacioni Turk Maarif, u mbajt këtë vit nën temën “Shërimi i botës përmes arsimit”, me Anadolu-n si një nga partnerët globalë të komunikimit.

Përveç Erdoğanit, folësit hapës përfshinin edhe zonjën e parë siriane Latifa Al-Droubi, ministrin turk të Arsimit Kombëtar Yusuf Tekin, dhe kreun e Fondacionit Maarif, Mahmut Ozdil.

Në fjalimin e saj, Erdoğan theksoi se samiti do të tregojë fuqinë e arsimit për të “ushqyer shpirtin e njerëzimit, shëruar plagët e tij dhe ndriçuar errësirën”.

“Ai do të na kujtojë se bota më e bukur është krijuar me stilolaps dhe se peshorja e drejtësisë mund të rregullohet vetëm nga ata që synojnë një botë të tillë,” tha ajo.

Pabarazi e thellë në qasjen globale ndaj arsimit

Në mbarë botën, “251 milionë fëmijë dhe të rinj janë ende jashtë shkolle sot”, tha Erdoğan, duke cituar Raportin Global të Monitorimit të Arsimit 2024.

Ajo nënvizoi se 33 për qind e fëmijëve në vendet me të ardhura të ulëta nuk kanë qasje në arsim, ndërsa në vendet me të ardhura të larta kjo përqindje është vetëm 3 për qind.

“Megjithatë, arsimi është një e drejtë themelore dhe derisa ajo 33 për qind të jetë në shkollë, peshorja e drejtësisë do të mbetet e anuar,” tha ajo.

Zonja e parë e Sirisë, Al-Droubi, u shpreh me keqardhje se mijëra shkolla në Siri janë shkatërruar gjatë luftës civile 13-vjeçare, dhe se një në tre fëmijë ende nuk ka qasje në arsim.

“Imagjinoni një vend ku fëmijët vrapuan drejt shkollave pa dyer, studiuan në ndërtesa pa çati dhe shkruan detyrat me dritë qiriu. Megjithatë, pavarësisht të gjithave, ata nuk reshtën asnjë çast së mësuari,” tha ajo.

Droubi theksoi se “talenti nuk mund të shkatërrohet, idetë nuk mund të kufizohen dhe e ardhmja që një fëmijë mbart në çantën e tij të shkollës nuk mund t’i merret kurrë.”

Ajo shtoi se Siria së shpejti do të ringrihet me gjithë popullin e saj, duke premtuar një vend të gatshëm të tregojë historinë e vet dhe, së bashku me komunitetin ndërkombëtar, të hapë një kapitull të ri për shkencën dhe jetën.

Në ditën e parë të samitit, sesionet trajtuan drejtimin strategjik dhe bazat e politikave të arsimit për të kontribuar në një botë më të mirë, dhe analizuan shkaqet dhe efektet e sfidave globale nga një perspektivë arsimore.

Pas samitit, Erdoğan shkroi në rrjetet sociale se ishte takuar me zonjën e parë siriane.

“Shpresoj që lidhjet e miqësisë që kontribuojnë në paqen dhe stabilitetin mes vendeve tona të forcohen dhe që hapat e përbashkët që sjellin shpresë dhe paqe në rajonin tonë të shtohen,” tha ajo në platformën turke NSosyal.