Marc Marquez i skuadrës Ducati Lenovo fitoi të dielën titullin e tij të shtatë kampion bote në MotoGP.

Gara e 17-të e sezonit në evenimentin më të madh të garave me motorë u zhvillua me 24 xhiro në pistën Motegi në Japoni.

Marquez doli i dyti pas shokut të tij të skuadrës, Francesco Bagnaia, i cili përfundoi garën për 42 minuta e 09.312 sekonda.

Piloti spanjoll përfundoi 4.196 sekonda pas Bagnaias, ndërsa spanjolli tjetër Joan Mir i Honda HRC Castrol mori vendin e tretë, 6.858 sekonda prapa liderit.

Megjithëse përfundoi i dyti, Marquez siguroi titullin e shtatë në karrierën e tij dhe u barazua me legjendën italiane Valentino Rossi, i cili ka gjithashtu shtatë tituj.

Marquez shpërtheu në lot pas fitores së titullit të tij të shtatë në MotoGP, duke thënë:
“Është e pamundur edhe të flas. Dua vetëm të shijoj momentin, por ka qenë me të vërtetë e vështirë; tepër e vështirë, por tani jam në paqe me veten time,”, tha ai mes lotësh.

32-vjeçari tha se bëri një gabim duke u rikthyer shumë shpejt në pistë.
“Bëra një gabim të madh në karrierën time, u ktheva shumë herët (pas operacionit), dhe pastaj luftova, luftova, luftova dhe fitova sërish! Prandaj jam në paqe,” shtoi ai.

Gara e 18-të e sezonit, Çmimi i Madh i Indonezisë në MotoGP, do të mbahet më 5 tetor.

Pesë pilotët e parë në renditjen e MotoGP janë si vijon:

Marc Marquez (Spanjë): 541 pikë

Alex Marquez (Spanjë): 340

Francesco Bagnaia (Itali): 274

Marco Bezzecchi (Itali): 242

Franco Morbidelli (Itali): 196