Sekretari amerikan i Marinës, John Phelan, të martën njoftoi një investim strategjik prej 448 milionë dollarësh në Sistemin Operativ të Anijeve (Ship OS), me qëllim përshpejtimin e adoptimit të Inteligjencës Artificiale (IA) dhe teknologjive autonome në të gjithë bazën industriale.

“Ky investim siguron burimet që u nevojiten ndërtuesve të anijeve, kantierëve dhe furnitorëve tanë për të modernizuar operacionet dhe për të përmbushur me sukses kërkesat mbrojtëse të vendit tonë”, tha Phelan.

“Duke i mundësuar industrisë të zbatojë gjerësisht IA-në dhe mjetet autonome, ne po e ndihmojmë sektorin detar të përmirësojë afatet, të rrisë kapacitetin dhe të ulë kostot. Kjo ka të bëjë me operim më të mençur dhe ndërtim të kapaciteteve industriale që i duhen marinës dhe vendit tonë”, shtoi ai.

Iniciativa do të menaxhohet nga Programi i Bazës Industriale Detare (MIB) i Marinës amerikane, në partneritet me Komandën e Sistemeve Detare (NAVSEA).

Ship OS do të konsolidojë të dhënat nga sisteme të ndryshme biznesi, baza të dhënash të trashëguara dhe burime operacionale, për të identifikuar pikat e bllokimit në prodhim, për të thjeshtuar rrjedhat e punës inxhinierike dhe për të mbështetur zbulimin e hershëm të rreziqeve.