Presidenti i Shqipërisë, Bajram Begaj, festoi sot Bajramin e Fitrit mes besimtarëve myslimanë në Golem, nga ku përcolli urimet për të gjithë shqiptarët. Gjatë vizitës në xhaminë e zonës, ai uroi besimtarët me mesazhin: “Gëzuar Fitër Bajramin”.

Begaj theksoi se vlerat e muajit të Ramazanit, si përkushtimi, vetëpërmbajtja dhe sakrifica, duhet të jenë pjesë e përditshme e jetës së secilit. Ai uroi që agjërimi dhe lutjet e besimtarëve të jenë pranuar, duke uruar paqe, gëzim dhe bekime për të gjithë.

Ndërkohë, në Kosovë, presidentja Vjosa Osmani vizitoi Bashkësinë Islame e Kosovës, ku u prit nga Myftiu Naim Tërnava. Ajo vlerësoi rolin e kësaj feste në forcimin e solidaritetit dhe vlerave njerëzore.

Osmani theksoi se bashkimi dhe solidariteti kanë qenë vendimtarë për tejkalimin e sfidave si popull, duke falënderuar edhe për angazhimin në ndihmë të familjeve në nevojë, veçanërisht gjatë Ramazanit.

Gjatë ditës, Bashkësia Islame e Kosovës pritet të presë edhe vizita nga përfaqësues të tjerë politikë dhe fetarë.