Türkiye, Pakistani dhe Arabia Saudite kanë përgatitur një draft të një marrëveshjeje për mbrojtje pas gati një viti bisedimesh, ka bërë të ditur ministri i Pakistanit për prodhimin në mbrojtje, duke sinjalizuar një lëvizje të mundshme drejt bashkëpunimit më të thellë rajonal në fushën e sigurisë.

Ministri i Jashtëm i Türkiyes, Hakan Fidan, ka verifikuar se diskutimet kanë ndodhur, por ka theksuar se deri tani nuk është nënshkruar asnjë marrëveshje.

Ministri pakistanez Raza Hayat Harraj i tha agjencisë Reuters të enjten se marrëveshja e propozuar trilaterale është e ndarë nga një marrëveshje dypalëshe e mbrojtjes e shpallur vitin e kaluar mes Pakistanit dhe Arabisë Saudite.

Harraj tha se para përfundimit të marrëveshjes do të kërkohej një konsensus përfundimtar nga të tre vendet.

“Marrëveshja trilaterale Pakistan–Arabia Saudite–Türkiye është diçka që tashmë është në proces,” tha Harraj.

“Draft-marrëveshja tashmë është në dispozicion te ne, tek Arabia Saudite dhe e njejta draft-marrëveshja është gjithashtu në dispozicion edhe te Türkiye. Dhe të tre vendet po diskutojnë. Kjo marrëveshje ka qenë në tavolinë për 10 muajt e fundit,” shtoi ai.

Harraj tha se diskutimet pasqyrojnë interesin e përbashkët të tre fuqive rajonale për të forcuar bashkëpunimin në mbrojtje në një kohë paqëndrueshmërie më të gjerë.

Arabia Saudite dhe Pakistani së fundmi nënshkruan Marrëveshjen Strategjike të Mbrojtjes së Ndërsjellë, duke u zotuar se “çdo agresion kundër njërës palë do të konsiderohet agresion kundër të dyjave”.

Fidan: Konsultimet po vazhdojnë

Duke folur të enjten në Istanbul, diplomati i lartë turk Hakan Fidan konfirmoi se bisedimet kanë ndodhur, por theksoi se ende nuk është nënshkruar asnjë marrëveshje.

Duke iu përgjigjur pyetjeve rreth raportimeve mediatike për një pakt të mundshëm trilateral, Fidan tha se diskutimet duhen parë në kontekstin e bashkëpunimit më të gjerë rajonal dhe jo si formim i një aleance të ngushtë.

Ai theksoi nevojën për besim mes vendeve të rajonit për të kapërcyer ndarjet që, sipas tij, kanë ushqyer konfliktin, terrorizmin dhe ndërhyrjet e jashtme.

“Në fund të të gjitha këtyre, ne kemi një propozim të tillë: të gjitha vendet e rajonit duhet të mblidhen për të krijuar një platformë bashkëpunimi për çështjet e sigurisë,” tha Fidan.

Ai shtoi se problemet rajonale mund të zgjidhen nëse vendet arrijnë “të jenë të sigurt për njëra-tjetrën”.

“Për momentin ka takime dhe bisedime, por nuk kemi nënshkruar asnjë marrëveshje,” tha Fidan.

“Vizioni i Presidentit tonë, Recep Tayyip Erdogan, është për një platformë gjithëpërfshirëse që krijon bashkëpunim më të gjerë dhe stabilitet.”

Fidan nuk i përmendi drejtpërdrejt Pakistanin apo Arabinë Saudite në deklaratat e tij, por tha se Türkiye mbetet e hapur ndaj nismave që promovojnë siguri afatgjatë rajonale dhe ndërtim besimi.

Komentet nga Islamabadi dhe Ankaraja nënvizojnë angazhimin e vazhdueshëm diplomatik mes tre vendeve, edhe pse zyrtarët theksojnë se diskutimet janë ende në fazë konsultative.