Kryeministri në detyrë i Kosovës, Albin Kurti ka paralajmëruar se gjatë kësaj jave do të nisin bisedimet për formimin e Qeverisë "Kurti 3".

Kurti nëpërmjet një konference për media ku foli për rezultatin e zgjedhjeve lokale të 12 tetorit, tha se dita e fundit kur do të mund të mbahet seanca e Kuvendit ku ai prezanton kabinetin e ri qeveritar është 26 tetori.

"Shumë shpejtë, qysh këtë javë, do të fillojmë komunikimin dhe bisedat për qeverinë qendrore. 

Sepse, Kosovës i duhet edhe një mandat i ri i qeverisë sonë. Neve na duhet një mandat në përputhje me rezultatin e 9 shkurtit 2025. Por, gjithashtu edhe unë si kryeministër në detyrë kam hyrë në muajin e shtatë të vitit të pestë të mandatit të plotë katër vjeçar dhe duhet të kemi një mandat të rregullt i cili pa dyshim do të fillojë posa ne ta nxjerrim në seancë parlamentare përbërjen e re të Qeverisë 'Kurti 3'", theksoi Kurti.

Ai u pyet nga gazetarët se bazuar në rezultatin e zgjedhjeve lokale të 12 tetorit, a janë të gatshëm për zgjedhje të reja parlamentare, derisa Kurti tha se fillimisht po përgatiten për të vazhduar qeverisjen ndërsa nëse nuk ka dakordim për këtë, janë të gatshëm për zgjedhje të reja.

"Po bëhemi gati për Qeverinë 'Kurti 3', nëse nuk ka Qeveri 'Kurti 3', pa dyshim që jemi të gatshëm për zgjedhje të reja parlamentare. Lëvizja Vetëvendosje në këtë 20 vjetorin e saj, në vitin 2025 është shembull e mësim se si organizohen njerëzit për parime politike me ideale kombëtare për të mirën e gjithë qytetarëve pa dallim. Andaj, gatishmëria jonë është e plotë, veçse njëherë plani ynë është për Qeverinë 'Kurti 3' dhe për këtë po përgatitemi ne dhe besoj që për këtë duhet të përgatiten edhe të tjerët", shtoi Kurti.

Më 11 tetor presidentja Vjosa Osmani, në mbështetje të kompetencave të saj kushtetuese, nënshkroi Dekretin, me të cilin mandatoi kreun e Lëvizjes Vetëvendosje, Albin Kurtin, për formimin e Qeverisë së Kosovës.

Ky vendim është marrë pas propozimit zyrtar të partisë Lëvizja Vetëvendosje, e cila me 48 mandate ka fituar numrin më të madh të ulëseve në Kuvend nga rezultatet e zgjedhjeve të mbajtura me 9 shkurt të këtij viti.

Sipas Kushtetutës, mandatari për formimin e Qeverisë, Kurti, është i obliguar që jo më vonë se 15 ditë nga dita e dekretimit, t'i paraqesë Kuvendit të Kosovës përbërjen dhe programin e Qeverisë për miratim.