Во изминатите 20 месеци, Царинската управа ги бележи најдобрите резултати во своето постоење. Остварени се највисоки приходи досега, што е јасен показател дека институцијата функционира поефикасно, поорганизирано и со поголема одговорност, истакна премиерот Христијан Мицкоски, на одбележувањето на годинишнината од постоењето на Царинската управа.

Особено значаен е фактот, според Мицкоски, што за првпат е надмината границата од 12 милијарди денари приходи во еден месец. Тоа, како што рече, е резултат кој не доаѓа случајно, туку е производ на системски пристап, засилени контроли и подобра координација.

„Кога ја презедовме одговорноста, не наследивме систем кој функционира беспрекорно. Напротив – затекнавме состојба на хаос, нарушени процеси и сериозно ослабена институционална поставеност. Систем кој со години бил запоставуван и руиниран. Но денес, со право можеме да кажеме дека таа фаза е надмината. Нормализацијата е завршена. Поставен е ред, воспоставени се правила и институцијата повторно функционира како што требаво служба на државата и граѓаните“, рече премиерот.

Целта на Владата како што истакна е да се продолжи во иста насока, „со дополнително унапредување на капацитетите, со модернизација на системите и со создавање услови за побрза и поефикасна услуга за стопанството, но и со цврст пристап кон спречување на нелегалните активности.

„Зад овие резултати стои трудот на сите вработени во Царинската управа. Вашата работа е значајна и видлива, а придонесот што го давате е од суштинско значење за функционирањето на државата. Во име на тоа би сакал да Ви се заблагодарам за вашата посветеност и професионалност. Нека овој јубилеј биде поттик за уште поголеми резултати во периодот што следи“, посочи Мицкоски.