Премиерите на Данска и Гренланд, Мете Фредериксен и Јенс-Фредерик Нилсен, денеска објавија дека ќе ги посетат Берлин и Париз за да ја зајакнат поддршката за неодамнешните закани на американскиот претседател Доналд Трамп дека САД ќе заземат арктички остров што ѝ припаѓа на Данска.

Фредериксен и Нилсен ќе се сретнат денеска со германскиот канцелар Фридрих Мерц и со францускиот претседател Емануел Макрон утре.

Тие ќе разговараат за „актуелната ситуација во надворешната политика и потребата од посилна Европа“, објави кабинетот на данскиот премиер.

Двајцата ќе присуствуваат и на економски самит во Германија.

Францускиот претседател Емануел Макрон ќе ги прими данската премиерка Мета Фредериксен и гренландскиот премиер Јенс-Фредерик Нилсен во Елисејската палата во среда, 28 јануари, на работен ручек, објавија претходно француските медиуми.

„Во оваа пригода, шефот на државата ќе ја потврди европската солидарност и поддршката на Франција за Данска и Гренланд, нивниот суверенитет и територијален интегритет. Тројцата лидери ќе разговараат за безбедносните прашања на Арктикот и економскиот и социјалниот развој на Гренланд, што Франција и Европската Унија се подготвени да го поддржат“, соопшти Елисејската палата, пренесува „Фигаро“.

Франција претходно одлучи да испрати околу петнаесет војници од 15 до 17 јануари во Гренланд, заедно со други европски воени сили, како дел од операцијата „Арктичка издржливост“, порака за единство упатена до американскиот претседател Доналд Трамп, кој силно се залага за присвојување на автономната данска територија, која ја смета за „витална“ за безбедноста на САД.