Саудиската нафтена компанија Арамко денес ја прекина работата во својата најголема рафинерија, Рас Танура, по нападот со беспилотно летало, во инцидент што предизвика паника на глобалните берзи и скок на цените на дизелот за повеќе од 20 проценти.

Според извори блиски до компанијата, работата на рафинеријата со капацитет од 550.000 барели дневно е прекината како мерка на претпазливост додека се проценува штетата, објавува Блумберг.

Рас Танура, која се наоѓа на брегот на Персискиот Залив, е клучен центар за снабдување со дизел и други транспортни горива во Европа.

Официјалната саудиска новинска агенција (СПА) потврди дека силите за воздушна одбрана на Ријад пресретнале двe беспилотни летала насочени кон фабриката Рас Танур, но и дека остатоците од соборените дронови предизвикале „ограничен пожар“ во комплексот.

Пожарот, наводно, е локализиран и ставен под контрола, а инженерите во моментов проверуваат за оштетување на резервоарите за складирање и терминалот за товарење.

Портпаролот на саудиското Министерство за одбрана изјави за телевизијата Ал Арабија дека две беспилотни летала биле пресретнати во близина на објектот, а нивните остатоци предизвикале мал пожар. Нема повредени.

„Нападот врз Рас Танур претставува значајна ескалација бидејќи енергетската инфраструктура на земјите од Персискиот Залив сега е директно цел на Иран“, рече Торбјорн Солтведт, водечки аналитичар за Блискиот Исток во компанијата за проценка на ризик Вериск Мејплкрофт.

Тој додаде дека овој потег би можел да ги охрабри Саудиска Арабија и соседните земји од Персискиот Залив да пристапат кон воените операции на САД и Израел против Иран.

Рас Танура е еден од најголемите терминали за извоз на нафта во светот, а секоја продолжена блокада на овој објект директно ја загрозува глобалната енергетска безбедност, особено во Европа, која се потпира на овој извор за своите транспортни потреби.