Два трговски брода под турско знаме се судрија во близина на брегот на истанбулскиот округ Силиври, при што властите го загубиле контактот со едниот брод и неговите 10 членови на екипажот, соопшти рано утринава Канцеларијата на гувернерот на Истанбул.

Трговскиот брод „Алсу“ под турско знаме, кој пловел од Коџаели кон Алијага, околу 3 часот по локално време се судрил со трговскиот брод „Тугберк Имамоглу“, исто така под турско знаме, кој пловел од пристаништето Искендерун кон Карадениз Ерегли, соопшти Канцеларијата.

Судирот се случил на 18 наутички милји јужно од Силиври.

Во соопштението се наведува дека на местото биле испратени пловила на Генералната дирекција за безбедност на крајбрежјето и Командата на Крајбрежната стража за Мраморното Море и теснеците, како и хеликоптер на Крајбрежната стража.

Првичните процени на екипите кои пристигнале на местото покажале дека на „Алсу“ нема видливи оштетувања.

Сепак, властите соопштија дека не успеале да воспостават контакт со трговскиот брод „Тугберк Имамоглу“ или со неговите 10 членови на екипажот, а во областа се спроведуваат операции за потрага и спасување.