Најмалку 39 луѓе загинале, а 170 лица се повредени во судир на два воза во Адуза, покраина Кордоба, во јужна Шпанија.

Од повредените 75 беа хоспитализирани. Петнаесет лица се во сериозна состојба, вклучувајќи четири деца.

Според првичните информации, вагоните од супер-брзиот воз, кој патувал за Мадрид излетале од шини и преминале на соседната пруга, при што се судриле со друг воз. Во двата воза имало вкупно 400 патници и членови на екипажот.

Министерот за транспорт Оскар Пуенте ја опиша несреќата како многу чудна, додека властите започнаа истрага.

Железничката компанија „Адиф“ соопшти дека несреќата се случила десет минути откако возот за Мадрид ја напуштил станицата во Малага, излетувајќи на прав дел од пругата.

„Силата на судирот ги турна вагоните од другиот воз во насип. Повеќето од загинатите и повредените биле во предните вагони од другиот воз, кој се движел од Мадрид до Уелва“, кажа Пуенте.

Типот на воз вклучен во несреќата бил „фрекија 1000“, кој може да достигне максимална брзина од 400 км/ч, изјави портпаролот на италијанската железничка компанија „Феровие дело Стато“.

Спасувачките екипи изјавија дека извитканите остатоци од возовите го отежнуваат извлекувањето на луѓето заробени во вагоните.

„Моравме да извадиме мртво лице за да можеме да стигнеме до некој жив. Тоа е тешка, сложена работа“, кажа шефот на противпожарната служба во Кордоба, Франсиско Кармона.

Официјалната причина за несреќата засега не е позната. Според Пуенте, утврдувањето на причините би можело да трае најмалку еден месец.