Украинскиот министер за надворешни работи Андриј Сибиха изјави дека украинскиот претседател Владимир Зеленски е подготвен да се состане со рускиот колега Владимир Путин за да разговараат за „најчувствителните“ прашања во мировниот план од 20 точки за ставање крај на речиси четиригодишната војна, пренесува Анадолу.
Сибиха рече дека Украина е подготвена да го потпише мировниот план, кој е предмет на преговори од ноември минатата година, под услов да се постигне договор.
Тој нагласи дека сè уште не се решени прашањата поврзани со териториите и функционирањето на нуклеарната централа Запорожје.
„Токму за да се решат овие прашања, претседателот е подготвен да се сретне со Путин и да разговара за нив“, изјави Сибиха.
Тој додаде дека не гледа потреба од средба со рускиот министер за надворешни работи Сергеј Лавров, наведувајќи дека „не треба да се создаваат паралелни рути“.
„Постојат преговарачки тимови во кои има претставници на Министерството за надворешни работи. Создавањето дополнителни рути за преговори не е потребно“, рече тој.
Осврнувајќи се на преговорите меѓу Русија, Украина и САД, одржани минатата недела во Абу Даби, главен град на Обединетите Арапски Емирати, Сибиха истакна дека е постигнат одреден напредок во преговорите за завршување на конфликтот, што довело до одржување на трилатералните средби.
Тој потврди дека во Абу Даби биле одржани и билатерални разговори, опишувајќи ги како „многу сложени“, но и „многу фокусирани“.
Сибиха информираше и дека биле одржани посебни преговори меѓу воените претставници на двете страни, при што се воделе „суштински“ преговори за параметрите на евентуален прекин на огнот и за тоа како тој прекин би се следел и проверувал.
Говорејќи за планот од 20 точки, Сибиха рече дека станува збор за билатерален договор меѓу Украина и САД, кој треба да биде потпишан од двете страни.
„САД треба одделно да потпишат договор со Русија. Во моментов, тоа е структурата за која се разговара, но преговорите сè уште траат. Тоа е процес“, додаде тој.
Во понеделникот, Зеленски во своето вечерно обраќање соопшти дека се водат прелиминарни преговори за нова средба меѓу руската и украинската делегација, која би можела да се одржи на 1 февруари.
Истиот ден портпаролот на Кремљ, Дмитриј Песков, изјави дека следната рунда мировни преговори со посредство на САД е планирана за наредната недела, повторно во Абу Даби, без да прецизира точен датум.
Русија и Украина одржаа дводневни консултации на 23 и 24 јануари во Абу Даби со учество на САД. Киев и Вашингтон ги оценија разговорите како „конструктивни“, а Песков истакна дека контактите започнале на конструктивен начин, но дека „претстои значајна работа“.
Во четвртокот, специјалниот пратеник на САД, Стив Виткоф, на настан во Давос, Швајцарија, изјави дека е постигнат „голем напредок“ во мировните преговори меѓу Русија и Украина и дека останало да се реши уште едно клучно прашање.
