Македонската армија е еден од најстабилните и најдоверливите столбови на државата и значаен фактор на регионалната и колективната безбедност, изјави претседателката и врховен командант, Гордана Силјановска‑Давкова откако началникот на Генералштабот, генерал-мајор Сашко Лафчиски, реферираше за реализираните активности во 2025 година, степенот на опременост на Армијата и нивото на борбената готовност.

„Нашата Армија е компатибилна, нашата Армија е компарабилна, нашата Армија е почитувана не само дома туку и надвор. И ние можеме со сигурност да кажеме дека состојбата е за поздравување. И мислам дека Армијата заслужува понатамошно разбирање и поддршка и од Владата, но и од сите нас. Ја имаат, се разбира, и мојата поддршка. Јас имам што да бранам, што да фалам, што да заштитувам и имам во што да верувам“, истакна претседателката по долгото реферирање.

На состанокот на кој присуствуваа и министерот за одбрана Владо Мисајловски, генералите од Армијата и претставници од кабинетите на претседателката и министерот, Силјановска-Давкова посочи дека долгиот состанок не е случаен, туку ја изразува сериозноста на Армијата, при што детаљната презентација потврдила дека Армијата, како што рече, ужива највисок углед во државава.

Претседателката посочи дека високата доверба на партнерите се гледа преку учествата во меѓународните мисии и големите вежби нагласувајќи дека годинава имавме на Криволак учество од 2.000 учесници.

Како посебно значаен момент од денешната презентација Силјановска‑Давкова ја истакна и, како што ја рече, силата на воената дипломатија, при што додаде дека нема мисија во која ние не сме биле оценети извонредно не само регионално туку и пошироко. Таа ја посочи одличната соработка со армиските структури на Грција и на Бугарија како пример за ефективна воена дипломатија.

Во однос на буџетските издвојувања за одбраната, претседателката нагласи дека во планирањето се забележува извонредна селектираност и квалитативна и стратешка рамка.

Во контекст на партнерствата, Силјановска‑Давкова рече дека станало јасно зошто сме почитуван стратешки партнер на Соединетите Американски Држави посочувајќи дека најголем дел од активностите се со нив, но и дека исто толку активности имаме и со ЕУ-партнерите. Таа ја повтори својата позиција дека пристапот треба да биде не или-или, туку и-и“.

Осврнувајќи се на застапеноста на жените во Армијата, претседателката посочи дека нивното учеството е речиси 24 отсто и дека целта е да достигнат 30 проценти.

Притоа истакна дека застапеноста е поголема во офицерскиот состав одошто во подофицерскиот и дека е потребно зголемување на подофицерскиот контингент. Таа најави залагање за формирање „национален центар за извонредност на жените во Армијата“, кој може да прерасне и во регионален центар.

Како што соопштија од ГШ на АРМ, генералот Лафчиски истакнал дека Армијата е подготвена целосно да ја изврши својата уставна улога – одбрана на Републиката, заштита на територијалниот интегритет и независноста и исполнување на националните и меѓународните обврски, меѓу кои и придонесот во колективната одбрана, меѓународните операции и заштитата на националните интереси.