Palestina i dorëzoi të martën ministrit të Jashtëm të Spanjës, Jose Manuel Albares, dekoratën më të lartë civile, si njohje për mbështetjen e tij ndaj kauzës palestineze.
Albares mori Yllin e Meritës të Urdhrit të Shtetit të Palestinës, i dhënë nga Presidenti i Autoritetit Kombëtar Palestinez (PNA), Mahmoud Abbas, i dorëzuar nga Ambasadori i Palestinës në Spanjë, Husni Abdelwahid, gjatë një ceremonie në “Casa Arabe” në Madrid.
Në fjalimin e tij, Albares tha se ky nder nuk reflekton vetëm përkushtimin e tij personal ndaj Palestinës, por edhe “përkushtimin e shumicës së shoqërisë spanjolle ndaj një kauze të drejtë për paqe, siguri si të drejtë themelore dhe ndaj vetë idesë së humanitetit, e cila sot po vihet në dyshim”.
Ai bëri thirrje për “hapa të pakthyeshëm për të avancuar zgjidhjen me dy shtete, të cilën e përshkroi si rrugën e vetme të qëndrueshme drejt paqes”, ndërsa shtoi se Spanja gjithmonë do të qëndrojë pranë popullit palestinez, duke mbështetur të drejtën e tyre për të jetuar me dinjitet, paqe dhe siguri.
Albares theksoi se palestinezët duhet t’i gëzojnë të njëjtat të drejta të barabarta si popujt e vendeve të tjera dhe si çdo qenie njerëzore.
Duke shtuar se “cikli ferrik i dhunës në Palestinë duhet të marrë fund”, ministri i Jashtëm spanjoll u shpreh mbi planin amerikan për paqen në Gaza, duke vënë në dukje se “pavarësisht disa hapave në drejtimin e duhur, plani është larg asaj që palestinezët kanë nevojë, pasi bombardimet po vazhdojnë dhe ndihmat humanitare thelbësore nuk po arrijnë në Gaza”.
Duke theksuar nevojën për garanci sigurie për stabilizimin e rajonit, Albares tha se Spanja do të vazhdojë t’i mbështesë të gjitha propozimet në këtë drejtim, veçanërisht mundësinë e vendosjes së një force ndërkombëtare që përfshin pjesëmarrjen palestineze.
Spanja e njohu zyrtarisht Shtetin e Palestinës më 28 maj 2024.
Në ceremoninë në Casa Arabe ishin të pranishëm disa ambasadorë, përfshirë edhe ambasadoren e Turqisë në Madrid, Nuket Kucukel Ezberci, si dhe ish-kryediplomatin e BE-së, Josep Borrell, i cili kishte marrë të njëjtin nder gjatë mandatit të tij.
