Presidenti amerikan Donald Trump falënderoi homologun e tij turk, Recep Tayyip Erdoğan, për ndihmën në ndërmjetësimin e armëpushimit në Rripin e Gazës.

“Ky zotëri nga një vend i quajtur Türkiye ka një nga ushtritë më të fuqishme, me të vërtetë, në botë. Është shumë më e fuqishme nga sa ai e lejon të dihet”, tha Trump, duke u shoqëruar nga presidenti turk në të majtë dhe udhëheqësit e Egjiptit dhe Katarit në të djathtë gjatë ceremonisë së nënshkrimit në Sharm el-Sheikh.

“Është i fortë, por ka qenë miku im, dhe sa herë kam pasur nevojë për të, ai ka qenë aty për mua. Pra, vetëm dua ta falënderoj presidentin Erdoğan të Türkiyes”, shtoi Trump.

Presidenti amerikan tha se Erdoğan “nuk na dështon kurrë”, duke e quajtur “shumë të mrekullueshëm” dhe duke e falënderuar për miqësinë e tyre të gjatë.

Egjipti tha se samiti që po organizon synon “të përfundojë luftën në Rripin e Gazës, të përforcojë përpjekjet për paqe dhe stabilitet në Lindjen e Mesme dhe të hapë një fazë të re sigurie dhe stabiliteti rajonal”.

Më herët sot, Hamasi dhe Izraeli kryen shkëmbim të të burgosurve që solli lirimin e qindra të burgosurve palestinezë nga burgu famëkeq ushtarak Ofer në Izrael dhe nga burgje të tjera izraelite në Shkretëtirën e Negevit. Ndërkaq, të 20 të burgosurit e gjallë izraelitë u liruan gjithashtu nga Hamasi.

Trump tha se po punohet për t'i gjetur trupat e pengjeve që kanë vdekur gjatë robërisë, duke shtuar: “Ata e dinë se ku ndodhen disa prej tyre, mendoj se pesë apo gjashtë janë ende atje”.

“Ata po i kërkojnë trupat. I dinë zonat dhe grupet e kërkimit janë atje dhe po e bëjnë këtë në bashkëpunim me Izraelin dhe do të gjejnë mjaft prej tyre”, tha ai.

Që nga tetori 2023, sulmet izraelite kanë vrarë mbi 67.800 palestinezë në Gaza, shumica gra dhe fëmijë, duke e lënë enklavën pothuajse të pabanueshme.