Türkiye ka mirëpritur të martën miratimin nga Parlamenti i Republikës Turke të Qipros Veriore (RTQV) të një rezolute mbi zgjidhjen me dy shtete të çështjes qipriote.

“Ky vendim është një shprehje e fuqishme e vendosmërisë së popullit turko-qipriot për të mbrojtur sovranitetin, identitetin dhe të ardhmen e tij,” shkroi zëvendëspresidenti turk Cevdet Yılmaz në platformën turke të mediave sociale NSosyal.

“Modeli federal, i cili ka dështuar të japë rezultate për gjysmë shekulli, tashmë është i konsumuar,” shtoi ai.

Një zgjidhje realiste, e qëndrueshme dhe e drejtë në ishull është e mundur vetëm mbi bazën e dy shteteve sovrane dhe të barabarta, tha Yılmaz, duke i uruar anëtarët e parlamentit të RTQV-së për këtë qëndrim në mbrojtje të së ardhmes, paqes dhe dinjitetit të popullit turko-qipriot.

Ai shtoi se mbështetja e Türkiyes për vullnetin e turko-qipriotëve për të marrë vendimet e tyre dhe për të përcaktuar të ardhmen e tyre do të vazhdojë.

RTQV-ja miratoi rezolutën me shumicë votash.

Qipro është përfshirë në një konflikt shumëvjeçar midis qipriotëve grekë dhe qipriotëve turq, pavarësisht përpjekjeve të shumta diplomatike të OKB-së për arritjen e një zgjidhjeje gjithëpërfshirëse.

Sulmet etnike që nisën në fillim të viteve 1960 detyruan qipriotët turq të tërhiqeshin në enklava për sigurinë e tyre.

Në vitin 1974, një grusht shteti i qipriotëve grekë që synonte bashkimin e ishullit me Greqinë çoi në ndërhyrjen ushtarake të Türkiyes si fuqi garantuese, për të mbrojtur qipriotët turq nga përndjekja dhe dhuna. Si rezultat, në vitin 1983 u shpall themelimi i Republikës Turke të Qipros Veriore (RTQV).

Në vitet e fundit ka pasur përpjekje të herëpashershme për paqe, përfshirë një iniciativë të dështuar në vitin 2017 në Zvicër, nën kujdesin e vendeve garantuese: Türkiyes, Greqisë dhe Mbretërisë së Bashkuar.

Administrata Greko-Qipriote u anëtarësua në Bashkimin Evropian në vitin 2004, të njëjtin vit kur qipriotët grekë bllokuan në mënyrë të njëanshme një plan të OKB-së për t’i dhënë fund konfliktit shumëvjeçar.