Dy anëtarë të forcave të sigurisë së brendshme të Sirisë u vranë të martën nga granatimet e grupeve të jashtëligjshme në provincën jugore Suwayda, sipas mediave lokale.
Televizioni shtetëror Alikhbaria, duke cituar një burim anonim, njoftoi se banda rebele lëshuan predha mortaje dhe kryen sulme me dronë në fshatin Rimat Hazem, në perëndim të fshatrave të Suwaydas.
Burimi shtoi se grupet rebele tentuan të avancojnë drejt pozicioneve të forcave të sigurisë, duke shënuar një shkelje të re të armëpushimit që ishte arritur muaj më parë.
Nuk u dhanë detaje për grupet që qëndrojnë pas sulmit.
Sulmi ndodhi një ditë pasi të hënën shpërthyen përleshje mes forcave siriane të sigurisë dhe grupeve të armatosura besnike ndaj Hikmat al-Hajri, një nga liderët druzë në Suwayda.
Burime lokale i thanë Anadolu se grupe të armatosura druze të lidhura me al-Hajri kryen sulme ndaj pozicioneve të ushtrisë siriane në fshatrat Al-Majdal, Rima Hazem, Walgha, Al-Mazraa dhe Ateel, në perëndim të Suwaydas.
Sulmet shënjestruan gjithashtu zona të banuara në fshatin Al-Mazraa, ndërsa ushtria siriane u kundërpërgjigj, duke shkaktuar përleshje, thanë burimet.
Suwayda ka qenë nën armëpushim që prej 19 korrikut, pas një jave përleshjesh mes grupeve druze dhe fiseve beduine, që lanë qindra të vrarë.
Ndërkohë, forcat e ushtrisë izraelite kryen të martën një bastisje të re në fshatrat jugore të provincës Quneitra, në shkeljen më të fundit të sovranitetit të Sirisë.
Televizioni Alikhbaria raportoi se një patrullë izraelite u dislokua në fshatin Saida al-Maqriz për rreth një orë, përpara se të tërhiqej.
Nuk pati reagim të menjëhershëm nga ushtria izraelite apo autoritetet siriane lidhur me raportimin mediatik.
Sipas të dhënave të qeverisë siriane, që nga dhjetori 2024, Izraeli ka kryer mbi 1.000 sulme ajrore në Siri dhe më shumë se 400 bastisje ndërkufitare në provincat jugore.
Pas rënies së regjimit të Bashar al-Assadit në fund të vitit 2024, Izraeli zgjeroi pushtimin e Lartësive Golan siriane duke marrë nën kontroll zonën tampon të çmilitarizuar, një veprim që shkel marrëveshjen e vitit 1974 me Sirinë.
