Numri i njerëzve në Somali që përballen me pasiguri akute ushqimore pritet të dyfishohet krahasuar me një vit më parë, pasi nivelet e urisë po rriten për shkak të përkeqësimit të thatësirës, konfliktit dhe rritjes së ndjeshme të çmimeve të ushqimeve, thuhet në një raport të publikuar të martën.

Iniciativa e Klasifikimit të Integruar të Fazave të Sigurisë Ushqimore (IPC) bëri të ditur se gjatë sezonit të thatë shkurt–mars 2026, rreth 6,5 milionë njerëz pritet të përballen me nivele të larta të pasigurisë akute ushqimore, Fazat 3 ose më lart të Pasigurisë Akute Ushqimore (AFI) sipas IPC-së. Kjo krahasohet me 3,4 milionë persona gjatë tremujorit të parë të vitit 2025.

Situata përkeqësohet edhe më tej nga ulja e ndihmave humanitare, pasi ndihmat humanitare për sigurinë ushqimore në janar 2026 arriti vetëm 17 për qind të 4,8 milionë njerëzve në nevojë, sipas IPC-së, një iniciativë e udhëhequr nga OKB-ja.

“Nga janari deri në dhjetor 2026, rreth 1,84 milionë raste të fëmijëve të moshës 6–59 muaj pritet të vuajnë nga kequshqyerja akute, përfshirë 483,000 raste të rënda që kërkojnë trajtim urgjent”, thuhet në raport.

Somalia, së bashku me OKB-në dhe partnerët humanitarë, lançuan muajin e kaluar Planin e Nevojave dhe Reagimit Humanitar për vitin 2026, i cili synon të sigurojë 852 milionë dollarë për të ndihmuar 2,4 milionë njerëz që kanë nevojë për ndihmë humanitare dhe mbrojtje jetike në vend.