Dronë të paidentifikuar janë vërejtur mbi një bazë ushtarake në Uashington, DC, ku qëndrojnë Sekretari amerikan i Shtetit Marco Rubio dhe Sekretari i Mbrojtjes Pete Hegseth, duke nxitur një takim në Shtëpinë e Bardhë dhe masa të shtuara sigurie, raportoi të mërkurën The Washington Post.

Dronët u zbuluan mbi Fort McNair gjatë një nate të vetme në 10 ditët e fundit dhe origjina e tyre mbetet e panjohur, thanë dy burime për gazetën.

Vëzhgimet shtynë zyrtarët të shqyrtojnë mundësinë e zhvendosjes së Rubios dhe Hegseth, megjithëse asnjëri prej tyre nuk është zhvendosur, tha një zyrtar i lartë i administratës për gazetën.

Sipas një zyrtari tjetër të lartë, ushtria ka operuar në një nivel më të lartë gatishmërie që nga fillimi i sulmeve ShBA-Izrael ndaj Iranit më 28 shkurt.

Zëdhënësi kryesor i Pentagonit, Sean Parnell, refuzoi të komentojë, duke theksuar se diskutimi i lëvizjeve të Hegseth do të ishte “jashtëzakonisht i papërgjegjshëm”.

Departamenti i Shtetit nuk iu përgjigj kërkesës për koment nga gazeta.